काठमाडौं । एनआइसी एसिया बैंकले भदौ २१ गतेदेखि १८ लाख ३० हजार युनिट ऋणपत्र निष्कासन गर्ने भएको छ । बैंकले निष्कासन गर्न लागेको १ अर्ब ८३ करोड रुपैयाँको ऋणपत्रमध्ये ३६ करोड ६० लाख रुपैयाँ बराबरको ऋणपत्र सर्वसाधारणलाई जारी गरिनेछ भने १ अर्ब ४६ लाख ४० हजार रुपैयाँ बराबरको ऋणपत्र बैंकले निजी संघसंस्थालाई बिक्री गर्नेछ ।
बैंकले यो ऋणपत्रमा वार्षिक ११ प्रतिशत ब्याज दिनेछ । बैंकले ६–६ महिनाको अन्तरालमा ब्याज भुक्तानी गर्ने जनाएको । ७ वर्ष अवधिको यो ऋणपत्र आर्थिक वर्ष २०८२।८३ मा परिपक्क हुनेछ । यसको प्रतियुनिट भाउ १ हजार रुपैयाँ तोकिएको छ । बैंकले ऋणपत्र निष्काशन तथा बिक्री प्रबन्धकको जिम्मेवारी नबिल इन्भेष्टमेन्ट बैंकिङ्ग तथा एनआइसी एसियाका सम्पूर्ण शाखा कार्यालयलाई दिइएको छ । त्यसैगरी, आस्वाबाट पनि आवेदन दिन पाउने व्यवस्था छ । हाल बैंकमा बचत खाताको ब्याजदर ६ प्रतिशत हाराहारीमा रहेको अवस्था छ ।
लगानीकर्ताले यो ऋणपत्रमा भदौ २५ गतेसम्म आवेदन दिन सक्नेछन् । यो अवधिमा आवश्यक आवेदन नपरेमा बैंकले असोज १९ गतेसम्म बिक्री खुला गर्न सक्नेछ । यसमा न्यूनतम २५ कित्तादेखि अधिकतम १ लाख ८३ हजार कित्तासम्म आवेदन दिन सकिनेछ । नेपाल धितोपत्र बोर्डले गत भदौ ८ गते एनआइसी एसियालाई ऋणपत्र निष्कासन अनुमति दिएको थियो ।
ऋणपत्र तोकिएको दर र समयमा सावाँ ब्याज भुक्तानी गर्ने सर्तमा जारी गरिएको एक प्रकारको धितोपत्र हो । लगानीकर्ताले लगानी गरेको रकमका आधारमा तोकिएको ब्याज पाउँछन् । बैंकले थप पुँजी निर्माणका लागि ऋणपत्र निष्कासन गरेको हो । केयर रेटिङ नेपालले यो ऋणपत्रलाई न्यून कर्जा जोखिम जनाउने केयर एनपि ए ग्रेडिङ साउन १ गते प्रदान गरेको हो । एनआइसी एसियाले गत पुसमा पनि ३ अर्ब रुपैयाँ बराबरको ऋणपत्र बिक्री गरेको थियो ।
२०७५ भदौ १२ गते प्रकाशित
वि.सं.२०७५ भदौ १२ मंगलवार १२:५१ मा प्रकाशित
