काठमाडौं । सवारी साधनको कुम्भ मेलाका रुपमा लिइने नाडा अटो शोमा गाडी खरिद गर्नेलाई बैंकहरुले सहुलियत ब्याजदरमा ऋण उपलब्ध गराउने भएका छन् । यही भदौ २६ गतेबाट काठमाडौंकको भृकुटीमण्डपमा सुरु हुने उक्त नाडा अटो शोलाई लक्षित गर्दै बैंकहरुले सहुलियत ब्याजदरमा ऋण उपलब्ध गराउन बिभिन्न योजना सार्वजनिक गर्दै छन् ।
नाडा अटो शोमा गाडी खरिद गर्नेलाई १० प्रतिशत ब्याजदरमा गाडी खरिद गर्न ऋण उपलब्ध गराउने तयारी गरेका छन् । अहिले अधिकांश बैंकले १३ प्रतिशत ब्याजदरमा अटो लोन दिँदै आएका छन् । बिगत बर्षहरुमा जस्तै यस बर्ष पनि सहुलियत ब्याजदरमा ऋण उपलब्ध गराउने तयारी गरिरहेको एक बैंकका प्रमुख कार्यकारी अधिकृतले बताए । बैंकहरुले अघिल्लो नाटा अटो शोमा ८ प्रतिशत ब्याजदरमा अटो लोन उपलब्ध गराएका थिए तर अहिले बैंकमा लगानीयोग्य पुँजीको अभाव भएकाले उक्त ब्याजदरमा दिन नसकिने बैंकर बताउँछन् । यस बर्षको नाडा अटो शोमा करिव १० प्रतिशत ब्याजदरमा बैंकले ऋण उपलब्ध गराउने सम्भावना भएको नाडा अटोमोबाइल्स एसोसिएसन अफ नेपालको भनाइ छ ।
६ दिनसम्म चल्ने उक्त मेलामा १९ ब्रान्डका चारपांग्रे, २० बान्डका दुईपांग्रे सवारी साधान राखिने भएको छ । ६० हजार दर्शकले प्रत्यक्ष रुपमा अवलोकन गर्ने अनुमान गरिएको उक्त मेलालाई लक्षित गरेर व्यवसायीले नयाँ गाडी भित्र्याउन सुरु गरेका छन् । नाडा अटो शोले दसै नेपालीको घर आगनमा आइपुगेको संन्देश दिने छ । उक्त शोमा नयाँ मोडलका कार, मोटर साइकल, बिभिन्न पाटपुर्जा प्रर्दशनीमा राखिने भएको आयोजकको भनाइ छ । अटोमोबाइल व्यवसाय प्रवद्र्धनमा थप टेवा पुगोस र उपभोक्ताले एकै ठाउँमा धेरै सवारी साधन बारे जानकारी पाउन भन्ने उद्देश्यले अटो शो गर्दै आएको नाडाले जनाएको छ । बैंकहरुले सहुलित ब्याजमा ऋण दिन थालेपछि सामान्य मानिसले पनि गाडी चढ्न पाएका छन् ।
पहिला पहिला धनाढ्य वर्गले मात्र कार चढथे । तर, अहिले सामान्य नागरिकले पनि किस्ता बन्दीमा तिर्ने गरी बैंकबाट ऋण लिएर कार चढन थालेका छन् । बैंकहरुले मुल्यको ६५ प्रतिशत सम्म अटो लोन दिने गरेका छन् । यसले पनि सवारी साधान चढ्न सहज भएको हो । पहिला राणाहरूले आफ्नो सौखिनताका लागि गाडी बोकाएर ल्याउने र उपत्यका भित्र्याउने अनि सहज रुपमा एक ठाउँबाट अर्को ठाउँमा पुग्ने गर्दथे । त्यसपछि बाटोको सञ्जाल विस्तारसँगै सवारी ल्याउन सहज हुन थाल्यो र आयात पनि त्यही अनुपातमा बढ्न पुग्यो । सवारीको आयात बढेसँगै सवारी उत्पादक कम्पनीहरूले नेपालमा आधिकारिक बिक्रेता तोकेर नै सवारी बिक्री थाले । यसरी सवारी बिक्री हुने क्रम बढेसँगै सवारी बिक्रेताहरूको संस्था स्थापना गरियो ।
२०३२ साल अटोमोबाइल एसोसिएस अफ नेपाल स्थापना भयो । २०६१÷६२ मा आइपुग्दा यो संस्थाको नाम नेपाल अटोमोबाइल डिलर एसोसिएसन (नाडा) राखियो । नाडा अटो शो भने सन् १९९८ देखि सुरु भएको थियो । त्यो वर्ष २६ प्रदर्शकहरू सहभागी थिए । त्यस पछिका केही वर्ष दुई वर्षमा एक पटक अटो शो हुँदै आएको थियो तर त्यसपछि प्रत्येक वर्ष नाडा अटो शो गर्न थालियो । हिन्दुहरुको महान चार्ड दसैलाई लक्षित गरेर यस्तो शो प्रत्येक वर्ष आयोजना गरिदै आएको छ ।
यस वर्षको नाडा अटो सो दसै आउनु भन्दा करिव एक महिना अघि गर्न लागिएको छ । दसैमा पुराना गाडी भएकाले नयाँ किन्ने र नभएकाले नयाँ सवारी किन्ने चलन छ । गाडी बिक्रीका लागि धेरे संस्था छन् । ती संस्थाहरुको छाता संस्था नाडा हो । २०७२ मा उक्त संस्थाको नाम पुन परिवर्तन गरि नाडा अटोमोबाइल्स एसोसिएसन अफ नेपाल राखिएको छ । यही संस्थाले प्रत्येक वर्ष सवारी साधनको कुम्भ भेला नाटा अटो शोको आयोजना गर्दै आएको छ ।
२०७५ भदौ १८ गते प्रकाशित
वि.सं.२०७५ भदौ १८ सोमवार ०९:५९ मा प्रकाशित
