काठमाडौं । सेयर बजार निरन्तर रुपमा उकालो लागेको बेला सर्वसाधारणलाई पुँजी बजारका बारेमा जानकारी गराउने उद्देश्यले अर्को साता लगानीकर्ता सप्ताह मनाउन लागिएको छ । धितोपत्र बोर्डहरूको नियमन निकाय आइएस्कोले असोज १५–२१ गते सम्म विश्व लगानीकर्ता सप्ताह मनाउन आह्वान गरेको हो । नेपालमा पनि नेपाल धितोपत्र बोर्डको अगुवाइमा उक्त सप्ताह मनाउन लागिएको हो ।
एकसातसम्म बोर्डले सर्वसाधारणलाई धितोपत्र तथा वस्तु विनियम बजारसम्बन्धी जानकारी गराउने छ । उक्त अवधिमा पुँजीबजारका बारेमा लगानीकर्तालाई सचेत गराइने भएको छ । अर्कोसाताको सुरुमा प्रभात फेरीको आयोजना गरिने बोर्डको भनाइ छ । सर्वसाधारणलाई जानकारी गराउन बोर्डले पम्प्लेट तथा लिफ्लेट प्रकाशन तथा वितरण गर्ने भएको छ । धितोपत्र बजारको अवस्था तथा प्रवृत्ति, बजारको विकास तथा विस्तारका लागि विगतका वर्षहरूमा भएका पहलहरूका बारेमा जानकारी गराइने छ ।
एक सातासम्म मनाइने यो कार्यक्रमबाट धितोपत्र तथा वस्तु विनिमय बजारसम्बन्धी सूचना, गतिविधि तथा महत्व र यससम्बन्धी साधन तथा सेवा र बजार विकासको अवस्थाका सम्बन्धमा आमसर्वसाधारणमा व्यापक जानकारी प्रवाह भई उनीहरूलाई बजार प्रवेश तथा लगानीसम्बन्धी सुसूचित निर्णय गर्न सहयोग पुग्ने बोर्डले अपेक्षा गरेको छ ।
यस कार्यक्रमले लगानीकर्ताको सशक्तीकरण हुने र यसबाट बजारको नियमन, सुधार तथा विकास कार्य थप सहज हुने तथा देशमा पुँजी बजारसम्बन्धी गतिविधिमा अझ व्यापकता आउने बोर्डको विश्वास रहेको छ ।
२०७५ असोज ७ गते प्रकाशित
वि.सं.२०७५ असोज ७ आइतवार ०८:१७ मा प्रकाशित