काठमाडौं । खाद्य संस्थानले आजबाट दसैंका लागि खसिबोका र च्याङ्ग्रा बिक्री सुरु गरेको छ । संस्थानले गतवर्षभन्दा सामान्य मूल्य बढाएर नयाँ मुल्य तोकेको छ ।
संस्थानका अनुसार खसीबोका प्रतिकिलो ५ सयका दरले उपभोक्ताले पाउनेछन् भने च्याङ्ग्रा प्रतिकिलो ७०० पर्ने भएको छ । संस्थानका अनुसार, निर्धारण गरेको खसीको ५१० र च्याङ्ग्राको ७१० रुपैयाँ प्रतिकिलोको मूल्यमा १० रुपैयाँ उपभोक्तालाई छुट दिइएको छ । किलोमा १० रुपैयाँ छुट दिएर बेच्दा खसीबोका प्रतिकिलो पाँच सय रुपैयाँ र च्याङग्रा सात सय रुपैयाँ प्रतिकिलोमा उपभोक्ताले पाउँछन् ।
संस्थानले गत वर्ष खसीबोका प्रतिकिलो ४ सय ५५ रुपैयाँ र च्याङ्ग्रा प्रतिकिलो ६ सय ७५ रुपैयाँमा बिक्री गरेको थियो । यस अनुसार खसीबोकामा प्रतिकिलो ४५ रुपैयाँ र च्याङ्ग्राको २५ रुपैयाँ मूल्य वृद्धि भएको छ ।
संस्थानले आफ्नो कार्यालय परिसर थापाथलीबाट दसैंका लागि काठमाडौमा १ हजार गोटा खसी र १ हजार गोटा च्याङ्ग्रा बिक्री गर्ने तय गरेको छ । बिक्रीका लागि हाल ५सय गोटा च्याङ्ग्रा र २ सयवटा खसी काठमाडौं ल्याइसकेको छ । थप आउनेक्रममा रहेको संस्थानले जनाएको छ । संस्थानले च्याङ्ग्रा मुस्ताङबाट ल्याउने गरेको छ । खसीबोका हेटौंडाबाट मात्र ल्याएको छ ।
२०७५ असोज २६ गते प्रकाशित
वि.सं.२०७५ असोज २६ शुक्रवार १०:२७ मा प्रकाशित