काठमाडौं । नेपाल स्टक एक्चेन्ज (नेप्से) ले आधुनिक प्रविधि अनलाइनबाट सेयर कारोबार गर्ने औपचारिक घोषणा गरेपनि त्यसको प्रयोगका सम्बन्धमा ब्रोकरहरु अलमलमा पर्दा कारोबारमा समेत प्रभाव परेको छ । तिहारपछि पहिलो दिन आइतबार खुलेको सेयर बजारमा ब्रोकर त अलमलमै परेका थिएन नै । त्यससँगै लगानीकर्ता पनि अलमलमा परेका थिए ।
नेप्सेलाई पनि भर्खर अनलाइन प्रणाली कार्यान्वयनमा ल्याउन हम्मेहम्मे परेको थियो । आइतबार पनि बजार खुल्दा नेप्से साइटमा समस्या देखिएको थियो । ब्रोकरहरुले पनि सहज तरिकाले नयाँ सिस्टम अझै चलाउन सकेका थिएनन् । त्यसैका कारण आइतबार सेयर बजारमा दोहोरो अंकको गिरावट आएको थियो । नेप्से सूचक आइतबार १७.३१ अंकले घटेर १२०५.२२ विन्दुमा आइपुगेको छ । उक्त दिन १२५ कम्पनीको ९ करोड ९४ लाख रुपैयाँभन्दा धेरैको सेयर कारोबार भएको छ । ३ लाख १४ हजार २९७ कित्ता सेयर खरिदबिक्री भएका छन् ।
कुल ९ वटा समूहको सेयर कारोबार भएकोमा २ वटा समूह बाहेक सबै समूहको सेयर घटेको थियो । दुईवटा समुहको सेयर भने बढेको थियो । साताको पहिलो दिन आइतबारको कारोबार रकममा प्रभु बैंकले अग्रता लिएको थियो । उक्त दिन प्रभुको ८४ लाख ८८ हजार रुपैयाँ भन्दा धेरैको सेयर कारोबार भएको हो । कारोबार रकमकै आधारमा दोस्रो र तेस्रो स्थानमा क्रमशः नेपाल बैंक र एनआइसी एसिया बैंक परेका छन् । उक्त दिन स्वदेशी लघुवित्तका लगानीकर्ताले सबैभन्दा धेरै कमाएका छन् भने सबैभन्दा धेरै गुमाउनेमा अपि पावरका लगानीकर्ता परेका छन् ।
२०७५ कार्तिक २६ गते प्रकाशित
वि.सं.२०७५ कात्तिक २६ सोमवार ११:१४ मा प्रकाशित
