काठमाडौं । मंगलबार र बुधबार दुई दिन सेयर बजार मापक नेप्से उकालो लागेको छ । त्यसभन्दा अघिल्ला दिन आइतबार र सोमबार दोहोरो अंकले घटेको सेयर बजार पछिल्ला दुई दिनमा भने बढेको छ ।
पछिल्लो समय प्रभु बैंकको सेयरप्रति लगानीकर्ताको ध्यान गएको छ । बुधबार प्रभु बैंककै सबैभन्दा धेरै रकमको सेयर कारोबार भएको छ । उक्त बैंकले चालु आर्थिक वर्षको तीन महिनामा राम्रो नाफा गरेको वित्तीय विवरण सार्वजनिक गरेपछि लगानीकर्ताहरु प्रभु बैंकको सेयर खरिद गर्नतिर लागेको ब्रोकरहरु बताउँछन् । आगामी दिनमा प्रभु बैंकको सेयर खरिद गरेर नाफा गर्न सकिने सम्भावना देखेका कारण लगानीकर्ताको आखाँ प्रभु बैंकको सेयर प्रति गएको हुनुपर्ने बिश्लेषकहरु बताउँछन् ।
अनलाइनबाटै सेयर कारोबार हुन थालेपछि सेयर बजारमा सुधार देखिएको हो । अन्तराष्टिय बजारमा पनि नयाँ प्रविधिबाट सेयर कारोबार हुँदा बजार बढने गर्छ । नेपालमा पनि त्यही क्रमले निरन्तरता पाएको हुनुपर्छ । निरन्तर ओरालो लाग्दै आएको सेयर बजार मापक नेप्से मंगलबार करिव १४ अंकले बढेको थियो भने बुधबार करिव १ अंकले मात्र बढेको छ ।
आइतबार र सोमबार दोहोरो अंकले घटेर नेप्से १२ सय अंक भन्दा तल आइपुगेको थियो । तर, मंगलबार १३.९७ बिन्दु र बुधबार ०.९८ विन्दुले नेप्से बढेपछि १२०८.५६ बिन्दुमा पुगेको छ । कात्तिक २० गतेदेखि नेपाल स्टक एक्चेन्ज (नेप्से) ले आधुनिक प्रविधि अनलाइनबाट सेयर कारोबार गर्ने औपचारिक घोषणा गरेपनि त्यसको प्रभावकारी कार्यान्वय हुन नसकेपछि साताको पहिलो दिन र दोस्रो दिन सेयर बजारमा खासै सेयर किनबेच हुन सकेको थिएन ।
अनलाइनबाट सेयर कारोबार गर्न ब्रोकरहरु अलमलमा पर्दा कारोबारमा समेत प्रभावित हुन पुगेको थियो । तर, पछिल्ला दुई दिनमा अनलाइन कारोबारमा सुधार भएको छ । पछिल्लो दुई दिन नेप्सेसँगै कारोबार रकममा पनि सुधार भएको छ । बैंक तथा वित्तीय संस्थाहरुले धमाधम नगद लाभांश वितरण गर्न थालेकाले पनि सेयर बजार उकालो लाग्न गएको कतिपयको बुझाइ छ । वाणिज्य बैंकहरुले पनि एकपछि अर्को गर्दै लाभांश घोषणा गर्न थालेका छन् । यसले पनि सेयर बजारमा सुधारको संकेत देखिएको हो ।
२०७५ कार्तिक २९ गते प्रकाशित
वि.सं.२०७५ कात्तिक २९ बिहीवार ११:१६ मा प्रकाशित
