काठमाडौं । केही फाइनान्स कम्पनीले वाणिज्य बैंकहरुले भन्दा पनि आकर्षक लाभांशको प्रस्ताव सार्वजनिक गरेका छन् । प्राय धेरैजसोले १० देखि १५ प्रतिशतसम्म लाभांश वितरण गर्ने प्रस्ताव गरिरहेका वाणिज्य बैंकलाई उछिन्दै केही फाइनान्स कम्पनीले २० प्रतिशत भन्दा बढी लाभांश दिन लागेका हुन् । प्राय धेरै वाणिज्य बैंकहरुले चुक्ता पुँजी आठ अर्ब पुगेकाले नगद मात्र दिने प्रस्ताव सार्वजनिक गरिरहेको बेला फाइनान्स कम्पनीले वोनस र नगद सेयर दिने प्रस्ताव अगाडि सारेका छन् ।
लगानीकर्ताको इच्छा ख्याल नगरी नगद लाभांश मात्र दिइरहेका वाणिज्य बैंकभन्दा एक कदम अगाडि बढेर फाइनान्स कम्पनीले वोनस र नगद लाभांश दिने प्रस्ताव गरेका हुन् । धेरैजसो फाइनान्स कम्पनीले लगानीकर्ताको चाहनालाई पूरा गर्न नगद र वोनस सेयर दिन लागेका हुन् ।
अहिलेसम्म लाभांश घोषणा गरेका ८ फाइनान्स कम्पनी मध्ये सबैभन्दा बढी लाभांश सिर्जना फाइनान्सले दिँदै छ । उसले वोनस र नगद सहित २४.५० प्रतिशत लाभांश दिने प्रस्ताव अगाडि सारेको छ । सिर्जना फाइनान्सले १५ प्रतिशत वोनस र ९.५० प्रतिशत नगद लाभांश दिन लागेको हो ।
यसैगरी, दोस्रो बढी लाभांश घोषणा गर्ने फाइनान्समा जानकी परेको छ । उसले वोनस र नगद गरेर २३.१६ प्रतिशत लाभांश दिने प्रस्ताव अगाडि सारेको हो । जानकी फाइनान्सले २२ प्रतिशत वोनस र १.१६ प्रतिशत नगद लाभांश दिँदै छ । तेस्रो बढी लाभांश घोषणा गर्नेमा पोखरा फाइनान्स परेको छ । उसले पनि वोनस र नगद गरी १३.६८ प्रतिशत लाभांश दिँदै छ । पोखरा फाइनान्सले ५ प्रतिशत वोनस र ८.६८ प्रतिशत नगद लाभांशको घोषणा गरेको छ ।
चोथौ बढी लाभांश घोषणा गर्नेमा श्री इन्भेष्टमेन्ट फाइनान्स परेको छ । उसले पनि सिर्जना, जानकी र पोखरा फाइनान्सले जस्तै वोनस र नगद गरी कुल १० प्रतिशत लाभांश वितरण गर्दै छ । श्री इन्भेष्टमेन्ट फाइनान्सले १.२३ प्रतिशत वोनस र ८.७७ प्रतिशत नगद लाभांश दिने घोषणा गरेको छ ।
अन्य चारवटा मन्जुश्री, आइसिएफसी, गुहेश्वरी र युनाइटेड फाइनान्सले भने नगद लाभांश मात्र दिने प्रस्ताव गरेका छन् । मन्जुश्रीले ९ प्रतिशत नगद, आइसिएफसीले ८ प्रतिशत नगद, गुहेश्वरीले ५.२६ प्रतिशत नगद र युनाइटेड फाइनान्सले ५ प्रतिशत नगद लाभांश दिने प्रस्ताव गरेका छन् ।
२०७५ मंसिर १० गते प्रकाशित
वि.सं.२०७५ मंसिर १० सोमवार १०:२६ मा प्रकाशित