काठमाडौं । आज (आइतबार) बाट सेयर किनबेच पूर्ण रुपमा अनलाइनबाटै हुँदै छ । नेपाल स्टक एक्सचेन्ज (नेप्से) ले लगानीकर्तालाई युजर नेम र पासवर्ड आजैबाट बाँडने भएकाले सेयर कारोबार पूर्ण रुपमा अनलाइनबाटै हुने भएको हो ।
अनलाइनबाट सेयर कारोबार हुन थालेपछि सेयर बजार बढने अपेक्षा लगानीकर्ताले गरेका छन् । अन्तराष्टिय बजारमा अनलाइनबाट कारोबार हुन थालेपछि ६० प्रतिशतसम्म सेयरको भाउ बढेको लगानीकर्ताको भनाइ छ । अनलाइनबाट सेयर कारोबार हुन थालेपछि नेपालमा पनि सेयरको भाउ बढने उनीहरुको तर्क छ ।
सामान्यतया नयाँ प्रविधि भित्र्याउँदा त्यसले लगानीकर्तालाई सहज हुने हुँदा सेयरको भाउ बढने ब्रोकरको भनाइ छ । तर, नेप्सेले भने सेयर बजार बढने र घटने माग र अपूर्तिमा भर पर्ने बताउँदै आएको छ ।
नेप्सेका महाप्रबन्धक चन्द्रसिंह साउदले लगानीकर्तालाई युजर नेम र पासवर्ड आजदेखि वितरण गर्ने बताए । त्यसपछि अनलाइनबाटै पूर्ण त सेयर कारोबार हुने उनको भनाइ छ । तर, त्यसले सेयर बजारमा कस्तो प्रभाव पार्ने भन्ने बारेमा भने उनले टिष्पणी गर्न चाहेनन् ।
लगानीकर्ताका चारवटै संगठन (नेपाल इन्भेस्टर्स फोरम, सेयर लगानीकर्ता संघ नेपाल, नेपाल पुँजी बजार लगानीकर्ता संघ र नेपाल पुँजी बजार संघ)का प्रतिनिधिले दुई साता अघि अनलाइन कारोबार प्रणाली प्रभावकारी नभएको भन्दै धर्ना दिएका थिए । त्यसपछि नेप्सेले आफ्नो कामको गतिलाई बढाएको हो ।
लगानीकर्ताहरु नेप्सेले कात्तिक २० गतेदेखि सञ्चालनमा ल्याएको अनलाइन कारोबार प्रणाली कार्यान्वयनमा देखिएको कमजोरी तथा बजार सुधारको माग गर्दै आएका छन् । उनीहरुले अनलाइन कारोबार पूर्ण रुपमा कार्यान्वयनमा नआएको भन्दै पुँजी बजारका १५ लाखभन्दा बढी लगानीकर्ता मर्कामा परेको बताएका छन् । यसले १४ खर्बभन्दा बढीको सम्पत्ति सुरक्षामा गम्भीर चुनौती थपेको आरोप लगानीकर्ताले लगाउँदै आएका छन् । लगानीकर्ताले छिटोभन्दा छिटो पूर्ण स्वचालित अनलाइनमार्फत काम गर्न युजर नेम र पासवर्डको व्यवस्था गर्न माग गर्दै आएका थिए ।
२०७५ मंसिर २३ गते प्रकाशित
वि.सं.२०७५ मंसिर २३ आइतवार १०:१० मा प्रकाशित
