काठमाडौं । नेपाल स्टक एक्सचेञ्जले बुटवल पावरको आइतबार शेयरमूल्य समायोजन गरेको छ। कम्पनीले गत आर्थिक वर्षको नाफाबाट वितरण गर्न प्रस्ताव गरेका बोनसको बुकक्लोजसँगै मूल्य समायोजन भएको हो ।
नेप्सेले बुटवल पावर को १० प्रतिशत बोनस पश्चात प्रतिकित्ता ३९९ रुपैयाँ नौं पैसामा शेयरमूल्य समायोजन गरेको छ । बुटवल पावर कम्पनीले गत वर्षको कमाइबाट २८ प्रतिशत लाभांश दिँदैछ । कम्पनीले १० प्रतिशत बोनस सेयर र १८ प्रतिशत नगद गरी कुल २८ प्रतिशत लाभांश दिन लागेको हो । प्रस्तावित लाभांश पुस २७ गते बस्ने वार्षिक साधारण सभामा पेश गरिने बुटवल पावरले जनाएको छ ।
बुटवल पावर कम्पनीले साधारण सभा गर्न पुस ६ गतेदेखि बुक क्लोज गरेको छ ।
पुस ५ गतेसम्म कायम रहेका सेयरधनी मात्र प्रस्तावित लाभांशको हकदार हुनेछन् । कम्पनीले हाल कायम २ अर्ब २१ करोड ८६ लाख ७२ हजार रुपैयाँ चुक्ता पुँजीबाट लाभांश वितरण गर्न लागेको हो ।
प्रस्तावित बोनसपछि चुक्ता पुँजी २ अर्ब ४४ करोड ५ लाख ३९ हजार २०० रुपैयाँ पुग्नेछ । चालु आर्थिक वर्षको पहिलो त्रैमासमा यसले १० करोड ३८ लाख २६ हजार रुपैयाँ खुद नाफा कमाएको छ । पहिलो त्रैमाससम्ममा यसको प्रतिसेयर आम्दानी ४ रुपैयाँ ६८ पैसा र प्रतिसेयर नेटवर्थ २९८ रुपैयाँ ११ पैसा छ ।
२०७५ पौष ८ गते प्रकाशित
वि.सं.२०७५ पुस ८ आइतवार १३:१४ मा प्रकाशित