काठमाडौं । पुँजी बजार मापक नेप्से यो साता सुधार देखिएको छ । नेप्से ११७०.७९ विन्दुमा रहेको नेप्से बिहीबार ११८०.८४ विन्दुमा उक्लिएको छ । यो साता करिव १० अंकले नेप्सेमा सुधार देखिएको छ । नेप्से सँगै कारोबार रकममा पनि सुधार आएको छ । साताको सुरुको दिन गत आइतबार ३१ कारोड रुपैयाँको सेयर कारोबार भएकोमा साताको अन्तिम दिन बिहीबार ३६ करोड ६० लाख रुपैयाँको सेयर कारोबार भएको छ । आइतबार भन्दा बिहीबार ५ कारोड ६० लाख रुपैयाँ बढीको सेयर कारोबार भएको हो ।
गत आइतबारको तुलनामा सोमबार र सोमबारको तुलनामा मंगलबार गर्दै क्रमश कारोबार रकम बढ्दै गएको छ । सोमबार ३० करोड २० लाख, मंगलबार ३४ करोड ३० लाख, बुधबार ३४ करोड ८० लाख र साताको अन्तिम दिन ३६ करोड ६० लाखको सेयर कारोबार हुन पुगेको छ । सेयर बजारमा नेप्से र कारोबारमा समेत सुधार देखिएकाले आगामी दिन बढ्ने संकेत देखिएको बिश्लेषकहरुको भनाइ छ ।
पुस मसान्तमा सावाँ, ब्याज र राजश्व तिर्नु पर्ने भएकाले पनि लगानीकर्ताहरुले सेयर बिक्री गर्दा नेप्से घटन पुगेको उनीहरु बताउँछन् । बैंक तथा वित्तीय संस्थाले चालु आर्थिक वर्षको दोस्रो त्रैमासिक वित्तीय विवरण सार्वजनिक गर्ने तयारी गरिरहेका छन् । उनीहरुले सार्वजनिक गर्ने वित्तीय विवरणमा नाफा बढने निश्चित छ । यसले पनि आगामी दिनमा सेयर बजार बढन सक्ने अनुमान गरिएको छ ।
यसैगरी, अनलाइन कारोबार हुन थालेको, सेयर धितोमा पहिलेको तुलनामा बढी ऋण लिन सकिने, ऋणको ब्याजमा कमी आउने संकेत देखिएकाले पनि सेयर बजार बढने अनुमान गरिएको ब्रोकरको भनाइ छ ।
२०७५ पौष २७ गते प्रकाशित
वि.सं.२०७५ पुस २७ शुक्रवार ११:१८ मा प्रकाशित
