काठमाडौं। स्पर्श लघुवित्तले यहि फागुन २६ गतेदेखि सर्वसाधारणका लागि आईपिओ जारी गर्ने भएको छ। कम्पनीले जारी पूँजीको ३० प्रतिशत २ करोड ६९ लाख ६३ हजार रुपैयाँ बराबरको शेयर निष्काशन गर्ने भएको हो ।
कम्पनीले सर्वसाधारणका लागि निश्कासन गर्न लागेको आइपीओमा फागुन २९ गतेभित्र आवेदन दिन सकिनेछ । सो अवधिमा मागेजति आवेदन नपरे ढिलोमा चैत २५ गतेसम्म आवेदन दिनसक्ने व्यवस्था गरिएको छ ।
कुल निश्कासन गर्ने भनिएको आइपीओमध्ये ४ हजार १४८ कित्ता कम्पनीका कर्मचारीका लागि, १३ हजार ४८२ कित्ता म्युचुअल फण्डहरुका लागि र बाँकी रहेको २ लाख ५२ हजार सर्वसाधारणका लागि सुरक्षित गरिएको छ । इच्छुकले न्यूनतम १० देखि अधिकतम १३४० कित्तासम्मका लागि आवेदन दिन सक्नेछन् ।
प्रतिकित्ता १०० रुपैयाँ दरले आइपीओ निश्कासन भएकोले साथमा १ हजार रुपैयाँ हुनेले समेत आवेदन दिन सक्नेछन् । यसको अर्थ पढ्दै गरेका विद्यार्थी र न्यून आम्दानी हुनेले समेत यो कम्पनीको आइपीओमा आवेदन दिन सक्नेछन् । यस आइपीओको निश्कासन तथा बिक्री प्रबन्धकमा सानिमा क्यापिटल लिमीटेड रहेको छ ।
आइपीओ निश्कासनपछि कम्पनीको चुक्तापूँजी बढेर ८ करोड २९ लाख पुग्नेछ । यस्तै, कम्पनीका सर्वसाधारणको सेयर स्वामित्व ३२.५ प्रतिशत र प्रोमोटरको ६२.५ प्रतिशत कायम हुनेछ । यो माइक्रोफाइनान्स कम्पनीले हाल १० जिल्लाका १५ शाखाबाट आफ्नो कारोबार संचालन गरिरहेको छ ।
चुक्ता पूँजी ५ करोड ५० लाख रुपैयाँ रहेको लघुवित्तको जगेडा कोषमा ८ लाख ३५ हजार रुपैयाँ सञ्चित छ। यस अवधिमा लघुवित्तको खराब कर्जा अनुपात ०.५१ प्रतिशत छ।
२०७५ फागुन १५ गते प्रकाशित
वि.सं.२०७५ फागुन १५ बुधवार १४:०३ मा प्रकाशित