काठमाडौं । सिंगापुर एयरलाइन्सको भगिनी कम्पनी सिल्क एयरले काठमाडौं(सिंगापुर(काठमाडौं रुटमा दैनिक उडान सुरु गरेको छ । साताको छ दिन उडान भर्दै आएको सिल्क एयरले शनिवारमा समेत सेवा सुरु गरेपछि दैनिक उडान हुन थालेको हो ।
सिल्कले थप उडान बोइङको ७३७९८०० एनजी बिमानबाट गर्नेछ । यो विमानमा १२ वटा बिजनेश क्लास तथा १५० वटा इकोनोमी क्लासको सिट उपलब्ध छ । उपभोक्ताले विमानमा उडान अवधिमा खाना, सिल्क स्टुडियोबाट मनोरञ्जन सुविधा पाउनेछन्। त्यसैगरी यात्रुले सिल्क तथा सिंगापुर एयलाइन्सको सिंगापुर हुँदै उड्ने कनेक्टिङ फ्लाइटमा थप व्यागेज सुविधा पनि पाउनेछन् ।
थपिएको एमआई ४१२ को उडान सिंगापुरको स्थानीय समयअनुसार बिहान ९ बजे उडान भर्नेछ भने काठमाडौं विमानस्थलमा स्थानीय समयअनुसार दिउँसो १२.०५ मिनेटमा अवतरण गर्नेछ । एमआई ४११ को उडान काठमाडौंबाट स्थानीय समयअनुसार दिउँसो १.०५ मा उडान भरेर सिंगापुरको स्थानीय समय साँझ ८.१५ मा सिंगापुरमा अवतरण गर्नेछ ।
हामी काठमाडौंमा दैनिक उडान सुरु गर्न पाउँदा गौरवान्दित छौं, सिल्क एयरका नेपाल म्यानेजर क्विन्ची चेनले भन्नुभयो, यसबाट यात्रुले अन्तराष्ट्रिय उडानमा ठूलो र फराकिलो पहुँच पाउनेछन् । हामीले सन् २००७ मा यो क्षेत्रमा उडान सुरु गरेदेखि यात्रुको संख्या बढिरहेको छ, दैनिक उडान सुरु गर्न पाएकोमा हामी खुशी छौं, उनले भने, शनिवारीय उडानले यात्रुलाई उनीहरुको गन्तव्यसम्म पुग्न अझ बढि सुविधा र अवसर प्रदान गर्ने विश्वास हामीले लिएका छौं।
२०७५ चैत २४ गते प्रकाशित
वि.सं.२०७५ चैत २४ आइतवार १०:४३ मा प्रकाशित
