काठमाडौं । प्रधानमन्त्री केपी शर्मा ओलीले आईतवार श्रीलंकाका प्रधानमन्त्री रनिल विक्रमासिंघेसँग फोनमा कुराकानी गर्दै बम बिस्फोटनको घटनामा कैयौं निर्दोषहरुको ज्यान गएकोमा दुःख व्यक्त गर्नुभएको छ ।
प्रधानमन्त्री ओलीले फोन वार्ताका क्रममा आफ्ना समकक्षी मार्फत वहाँ स्वयं र श्रीलंकाली जनताप्रति हार्दिक समवेदना प्रकट गर्नुभएको छ । कुराकानीका क्रममा प्रधानमन्त्री ओलीले बिस्फोटमा परी जीवन गुमाउनेहरुप्रति श्रद्धासुमन अर्पण गर्दै घाइतेहरुको शीघ्र स्वास्थ्य लाभको कामना गर्नुभएको छ । सम्वादका क्रममा प्रधानमन्त्री ओलीले भन्नुभयो “ श्रीलंकाका विभिन्न स्थानहरुमा भएको श्रृंखलावद्ध वम आक्रमणमा परी कैयौं निर्दोषहरुले जीवन गुमाउनु परेको घटनाले मलाई अत्यन्त दुःखी बनाएको छ । ”
प्रधानमन्त्री ओलीले फोन सम्वादका क्रममा नेपाल सरकारले जुनसुकै रंग र रुपको आतंकवादको विरुद्धमा उभिने आफ्नो सैद्धान्तिक अडान अनुसार मानवता विरोधी घटनाको भत्सर्ना गरेको बताउनुभएको छ । प्रधानमन्त्री ओलीले फोन सम्वादमा श्रीलंकामा भएको यस दुःखत घडीमा श्रीलंकाका जनताको साथमा नेपाली जनता भएको बताउनुभएको छ ।
२०७६ बैशाख ९ गते प्रकाशित
वि.सं.२०७६ वैशाख ९ सोमवार ११:४६ मा प्रकाशित