काठमाडौं । नेपाल कम्युनिष्ट पार्टीका ४४ जनवर्गीय संगठनहरुको संयुक्त भेलाले नेपाल सरकारले घोषणा गरेको वृक्षारोपण वर्षलाई सफल पार्नका निम्ति असार १४ गते वृक्षारोपण कार्यक्रममा सक्रियतापूर्वक भाग लिने निर्णय गरेको छ । नेकपा का सचिवालय सदस्य तथा अखिल नेपाल किसान महासंघका संयोजक वामदेव गौतमको संयोजनमा असार ११ गते आयोजित कार्यक्रममा वन तथा वातावरण मन्त्री शक्तिबहादुर बस्नेतको विशेष उपस्थिति थियो ।
नेपाल सरकारले यस आर्थिक वर्ष २०७६ र ०७७ लाई वृक्षारोपण वर्षका रुपमा मनाउने निर्णय गर्नुका साथै असार १४ गते राष्ट्रव्यापी वृक्षारोपण कार्यक्रम सम्पन्न गरी वार्षिक वृक्षारोपण कार्यक्रमको शुभारम्भ गर्ने निर्णय गरेको छ । उक्त दिन नेपाल कम्यु्निष्ट पार्टी (नेकपा) सम्बद्ध जनवर्गीय संगठनहरुद्वारा सरकारको यस निर्णयलाई हार्दिक समर्थन गर्दै वर्षभरि अत्यन्तै उत्साहका साथ कार्यक्रममा भाग लिने प्रतिवद्धता व्यक्त गरिएको छ ।
२०७६ असार १२ गते प्रकाशित
वि.सं.२०७६ असार १२ बिहीवार ११:३१ मा प्रकाशित