काठमाडौं । माध्यमिक परिक्षा बोर्ड (एसईई) को परिक्षाफल प्रकाशनमा नेपाल टेलिकमले गरेको त्रुटिका कारण अभिभावक तथा विद्यार्थीले सास्ती पाएका छन् । टेलिकमको वेबसाइटमार्फत परिक्षाफल हेर्दा गणित विषयमा समेत प्राक्टिकल अंक देखिएपछि परिक्षार्थीहरु अन्यौलमा परेका थिए । परिक्षाफल प्रकाशित हुनेवित्तीकै परिक्षाको लब्धांक पत्रमा सुरुमा गणित विषयमा पनि प्राक्टिकल अंक जोडिएको भएपनि पछि टेलिकमले यसलाई सच्याएको छ ।
नेपाल टेलिकमले डाटा अपलोड गर्ने बेलामा सामान्य त्रुटि गरेका कारण धेरै विद्यार्थीको ग्रेड सिटमा गणितमा पनि प्राक्टिकल अंक देखिएको नेपाल परिक्षा बोर्डका अध्यक्ष डा. चन्द्रमणि पौडेलले जानकारी दिए, पौडेलले भने, “टेलिकमले डाटा हाल्ने बेलामा गलत गरिदिएछ, अहिले सच्याइसकिएको छ ।”
यसैकारण नतिजा प्रकाशन हुनेवित्तीकै ग्रेड सिट डाउनलोड गरेका विद्यार्थीले पुनः नतिजा हेर्नुपर्ने भएको छ । अध्यक्ष पौडेलले पनि यसअघि ग्रेड सिट हेरेकालाई फेरि हेरेर कन्फर्म गर्न आग्रह गरेका छन् ।
रिजल्ट अपलोड गर्ने क्रममा त्रुटि भएपछि विद्यार्थी तथा अभिभावकले दुःख पाएका हुन् । एसईईको परिक्षा दिने विद्यार्थीले गणित र अतिरिक्त गणीत बाहेक अन्य विषयमा ७५ पुर्णाङ्कको मात्र जाँच दिनुपर्ने हुन्छ तर, परिक्षाफलमा भने गणीतमा पनि प्राक्टिकल अंक देखिएपछि विद्यार्थी अन्यौलमा परेका हुन् ।
२०७६ असार १३ गते प्रकाशित
वि.सं.२०७६ असार १३ शुक्रवार १२:३६ मा प्रकाशित