काठमाडौं । प्रहरी महानिरीक्षक सर्वेन्द्र खनालले ट्राफिक प्रहरीले सवारी चालकलाई एउटा आपराधिक व्यक्तिलाई झैँ गर्ने गरेको भन्दै यस्तो व्यवहार नगर्न सुझाव दिएका छन् ।
प्रहरी महानिरीक्षक खनालले आइतवार बिहान महानगरीय ट्राफिक प्रहरी महाशाखा पुगेर कार्यालयको अनुगमन गर्ने क्रममा यस्तो सुझाव दिएका हुन् । “यात्रुलाई नियम कानुन लगाउनु भनेको सुधारात्मक पाटो हो। कहिले काँहि ट्राफिक प्रहरी व्यवहारिक भएर यात्रुलाई व्यवहार गर्नुहोला, यात्रु अपराधी होइनन्” महानिरीक्षक खनालले भने । खनालले ट्राफिक प्रहरीको काम कर्तव्य र भूमिकाबारे समेत उपस्थित ट्राफिक प्रहरीलाई जानकारी दिएका थिए।
पछिल्लो समय ट्राफिक प्रहरीले सिमिति स्रोतसाधनको बाबजुद पनि राम्रो काम गरेको भन्दै आफ्नो बोली, आचरण राम्रो बनाएर ट्राफिक व्यवस्थापनलाई सहज, प्रभावकारी र चुस्त बनाउन निर्देशन पनि दिएका थिए। उपत्यकाको ट्राफिक व्यवस्थापनका लागि महाशाखाले गरेको कार्यप्रगतिबारे महाशाखाका प्रमुख एवं प्रहरी वरिष्ठ उपरीक्षक वसन्तकुमार पन्तले जानकारी गराएका थिए।
प्रहरीको तथ्यांक अनुसार उपत्यकाभित्र हाल १२ लाख भन्दा बढी सवारी साधनहरू गुड्ने गरेको देखिन्छ ।
२०७६ साउन १३ गते प्रकाशित
वि.सं.२०७६ साउन १३ सोमवार १३:४८ मा प्रकाशित