काठमाडौं । २०२१ सालको नापी पुरानो भएको भन्दै मुलुकमा फेरि देशभर नापी गरिने भएको छ । भूमि व्यवस्था, सहकारी तथा गरिबी निवारणमन्त्री पद्मा अर्यालले देशभर फेरि नापी गर्ने तयारी भइरहेको जानकारी गराउनु भएको छ ।
मन्त्री अर्यालले साँखुमा आधुनिक प्रविधियुक्त मालपोत कार्यालय उद्घाटन गर्दै २०२१ सालको नापी पुरानो भएको बताउनु भएको हो ।
‘पहिलाको नापी अनुपयुक्त भइसकेको छ’ उहाँले भन्नुभयो, ‘त्यसकारण अब फेरि नापी गर्नुपर्ने अवस्था देखिएको छ । सरकारले फेरि नापी गर्नको लागि प्रकृया अगाडि बढाइसकेको छ ।’
भूमि व्यवस्था मन्त्रालयका अनुसार मुलुकमा २ करोड ८० लाख जग्गाधनी छन् । १ सय २६ मालपोत कार्यालयबाट जग्गा किनबेच तथा नामसारी हुँदै आएको छ । त्यसमध्ये ७६ वटा कार्यालयमा कम्युटर प्रणाली अपनाइएको छ । मन्त्री अर्यालले काठमाडौं कलंकी, साँखु र भरतपुरसहित ४ कार्यालय अत्याधुनिक प्रणाली अपनाइएको जानकारी दिनुभयो ।
कार्यक्रममा काठमाडौ क्षेत्र नम्बर २ का सामानुपाकि सांसद सरिता न्यौपाने, प्रदेश सांसद मणिराम फुयाँल, मन्त्रालयका सचिव गोपीनाथ मैनाली र शंखरापुर नगरपालिकाका मेयर सुवर्ण श्रेष्ठ लगायतका वक्ताले मालपोत मुलुकभरीको सम्पति लेखाजोखा गर्ने निकायले यसलाई सुरक्षित ढंगले संचालन गर्नुपर्ने बताउनु भयो ।
२०७६ साउन १५ गते प्रकाशित
वि.सं.२०७६ साउन १५ बुधवार १६:०५ मा प्रकाशित
