काठमाडौं । नेपाल सरकारले दमकमा बन्ने औद्योगिक पार्कका लागि ६४ अर्ब रुपैयाँ बराबरको लगानी स्वीकृति गरेको छ ।
लासा इकोनोमिक एण्ड टेक्नोलोजी डेभलपमेन्ट जोन जिङपिङ जोइन्ट कन्स्ट्रक्सन प्रोजेक्टले ल्याउन लागेको विदेशी लगानी प्रधानमन्त्री केपीशर्मा ओलीको अध्यक्षतामा बसेको लगानी बोर्डको बैठकले लगानी स्वीकृत गरेको हो ।
चाइना नेपाल फ्रेन्डसीप इन्डस्ट्रियल पार्क दमक नाम राखिएको पार्कको विस्तृत सम्भावना अध्ययनका लागि दमक क्लिन इन्ड्रस्ट्रियल पार्कलाई अनुमति समेत दिइएको छ ।
दुई वर्ष अघि औद्योगिक क्षेत्र अध्ययन गर्न आएको १२ सदस्यीय चिनियाँ टोली नेपाल आएको थियो । ल्हासा आर्थिक तथा प्राविधिक विकास क्षेत्रको कार्यकारी समितिका उपसचिव लिउ रुपेङ नेतृत्वको अध्ययन टोलीले चीननेपाल इन्डस्ट्रियल पार्क निर्माणको समझदारीपत्रबारे स्थानीय सरोकार भएका पक्ष र नगरपालिकाका प्रतिनिधिसँग छलफल गरेको थियो ।
त्यही बेला नगरपालिकाका कार्यकारी अधिकृत युवराज दाहालले चीन सरकारले तीन खर्ब ३३ अर्ब रुपैयाको लगानीमा औद्योगिक उद्यान बनाइदिनेसम्बन्धी सम्झौता भइसकेको जानकारी गराएका थिए ।
२०७६ साउन १९ गते प्रकाशित
वि.सं.२०७६ साउन १९ आइतवार ०७:२९ मा प्रकाशित
