बागलुङ । आन्तरिक राजश्व कार्यालय बागलुङले आर्थिक वर्ष २०७५/०७६ मा ६५ करोड ९२ लाख रुपैयाँ राजश्व संकलन गरेको छ ।
करदाता सेवा कार्यालयबाट गतवर्ष भदौंमा स्तरोन्नती भएर आन्तरकि राजश्व कार्यालय बनेपछि राखिएको लक्ष्यमा २८ प्रतिशत बढी कर संकलन गरिएको हो ।
कार्यालयले आर्थिक वर्ष २०७५/०७६ का लागि ५१ करोड २३ लाख ५१ हजारको लक्ष्य राखिएकोमा २८ दशमलव ६७ प्रतिशत बढी राजश्व संकलन भएको कार्यालय प्रमुख हेमराज सुवेदीले जानकारी दिनुभयो । त्यस्तै कार्यालयले आयकर ४५ करोड संकलन गरेको छभने मूल्य अभिवृद्धि कर १६ करोड ८५ लाख र अन्तशुल्क कर ९२ लाख ९० हजार रुपैयाँ संकलन गएको जनाएको छ । यसअघि करदाता सेवा कार्यालय मात्र रहेकोमा अहिले कार्यालयको बढुवा भएपछि अहिले करको दायरा फराकिलो बनाउने अभियान थालनी गरिएको छ ।
अभियानको थालनी पछि बागलुङसहित पर्वत, म्याग्दी र मुस्ताङमा करदाता शिक्षा कार्यक्रम, नयाँ करका क्षेत्र पहिचान गर्दा कर संकलनमा वृद्धि भएको कार्यालयले जनाएको छ । अभियानपछि साना तथा मझौला उद्योग, व्यवसायी, सहकारी संस्था र संस्थागत विद्यालय समेतले कर तिर्न थालेका छन् ।
कार्यालयमा गत असार मसान्तसम्म व्यक्तिगत रुपमा २ हजार ३७ जनाले व्यपारिक पान नम्बर लिएका छनभने व्यक्तिगत ४ हजार ५ सय ८ जनाले लिएका छन् । यस्तै एक आर्थिक वर्षमा २ सय ३ व्यवसाय भ्याटमा दर्ता भएका छन् । अहिलेसम्म कार्यालयमा २४ हजार २ सय ७० करदाता सूचिकृत भैसकेका छन् ।
२०७६ साउन १९ गते प्रकाशित
वि.सं.२०७६ साउन १९ आइतवार १०:१९ मा प्रकाशित