काठमाडौं । नेपाल विद्युत् प्राधिकरण पछिल्लो दुई वर्षदेखि नाफामा जान लागेको छ । विद्युत प्राधिकरणले गत आर्थिक वर्षमा नाफा १२४ प्रतिशत बढाएको छ । गत असारसम्म प्राधिकरणले ६ अर्ब ३८ करोड रुपैयाँ खुद नाफा गरेको छ ।
अघिल्लो आर्थिक वर्ष २०७४/०७५ मा २ अर्ब ८४ करोड ८१ लाख रुपैयाँ खुद नाफा कमाएको थियो । अघिल्लो वर्षको तुलनामा गत आर्थिक वर्षमा विद्युत् प्राधिकरणले ३ अर्ब ५३ करोड १९ लाख रुपैयाँ खुद नाफा बढाएको स्रोतले बतायो । बिहारबाट खरिद गरिएको बिजुली महँगो परेकाले नाफा कम देखिएको प्राधिकरण स्रोतको दाबी छ । बिहारको बिजुलीको भाउ महँगो नपरेको भए खुद नाफा १० अर्ब रुपैयाँ पुग्ने स्रोतको भनाइ छ ।
संस्थागत सुशासन, अनावश्यक खर्च कटौती र चुहावट नियन्त्रणले गर्दा नाफा बढेको प्राधिकरण जनाएको छ । २०७३ भदौमा कुलमान घिसिङ कार्यकारी निर्देशकमा नियुक्त हुँदा प्राधिकरण आठ अर्ब ८९ करोड खुद नोक्सानीमा थियो । उहाँको व्यवस्थापकीय कुशलताले मुलुकलाई लोडसेडिङ मुक्त मात्रै गरेन घाटामा रहेको प्राधिकरणलाई नाफामा लैजान पनि सफल भएको छ ।
प्राधिकरणले औसत आठ रुपैयाँमा बिजुली किनेर १० रुपैयाँ ४ पैसामा बिक्री गर्दै आएको छ ।
२०७६ साउन २१ गते प्रकाशित
वि.सं.२०७६ साउन २१ मंगलवार १४:४७ मा प्रकाशित