पर्वत । पर्वतको कुस्मा बजारबाट बाग्लुङ जिल्लाको बलेवा क्षेत्र जोडिने गरी कालीगण्डकी नदीमाथि निर्माणाधीन बन्जिजम्पको ९० प्रतिशत काम सम्पन्न भएको छ ।
बागलुङ बलेवातर्फको करिब ३० मिटर मात्रै जोड्न बाँकी रहेको निर्माणपक्षले जनाएको छ । निर्माणका क्रममा नाकाबन्दी तथा निर्माण सामग्री अभावको समस्या झेल्दै आएको बन्जिजम्पले अहिले अन्तिम रूप लिएको छ ।
निजी क्षेत्रका प्रतिष्ठित व्यवसायी तथा उद्यमीको सहकार्यमा १५ करोडको लागतमा निर्माण सम्पन्न गर्ने लक्ष्य राखिएको थियो । तर, विविध कारणले १७ करोड रुपैयाँ पुगेको सञ्चालक राजु कार्कीले जानकारी जानकारी दिनुभयो ।
कालीगण्डकी नदीमाथि निर्माणाधीन यो बन्जिजम्पको कुल लम्बाइ ५ सय २० मिटर र उचाइ २ सय २८ मिटर रहेको छ । बन्जिजम्प निर्माणसँगै स्विङ, साइक्लिङलगायत अन्य साहसिक खेलसमेत समावेश गरिएको छ ।
एक साताभित्र पुलको काम सम्पन्न हुने निर्माणपक्षले जनाएको छ । बन्जिजम्प निर्माणसँगै पर्वतको पर्यटन व्यवसायमा टेवा पुग्ने देखिएको छ ।
२०७६ साउन २३ गते प्रकाशित
वि.सं.२०७६ साउन २३ बिहीवार १०:५१ मा प्रकाशित