भक्तपुर । भक्तपुर घुम्न आउने पर्यटकको संख्या करिब १४ प्रतिशतले बढेको छ । सांस्कृतिक सम्पदाको भ्रमण तथा अध्ययन गर्ने पर्यटकको संख्या वर्षेनी बढेको पर्यटन सूचना केन्द्रको तथ्यांकले देखाएको छ ।
केन्द्रका अनुसार आर्थिक वर्ष २०७५/७६ मा पर्यटकको संख्या २ लाख ५८ हजार ५ सय ८८ पुगेको छ । २०७४/७५ मा २ लाख २७ हजार ६ सय १४ थियो । केन्द्रका अनुसार भूकम्पमा भत्किएका मठमन्दिरका संरचना तीव्र रूपमा पुनर्निर्माण भइरहेको छ । ती मठमन्दिर र पुरानो स्वरूप हेर्न पनि पर्यटकको घुइँचो दिनहुँ बढ्दै गएको छ । गत वर्षको तुलनामा ३ हजार ९ सय ७४ पर्यटक संख्या बढेको हो ।
केन्द्रका अनुसार भक्तपुरमा सार्कसँगै अन्य मुलुकबाट पनि भ्रमण गरेका छन । सार्क र चीनबाट मात्रै १ लाख १७ हजार ३ सय पर्यटकले भ्रमण गरेका छन् । २०७४/७५ मा ९९ हजार ९ सय ८० ले मात्रै भ्रमण गरेका थिए । सार्क र चीनबाहेक अन्य मुलुकबाट १ लाख १४ हजार २ सय १६ जनाले भ्रमण गरेको केन्द्रको तथ्यांकमा छ ।
केन्द्रका अनुसार पर्यटकबाट २७ करोड ५ लाख १० हजार राजस्व संकलन भएको छ । आर्थिक वर्ष २०७४/७५ मा भने २४ करोड १४ लाख ४१ हजार राजस्व संकलन भएको थियो ।
२०७६ साउन २६ गते प्रकाशित
वि.सं.२०७६ साउन २६ आइतवार १०:४७ मा प्रकाशित