काठमाडौं । चाडपर्व नजीकिँदै गर्दा संघीय सरकारले उपभोक्ता अधिकार स्थापित गर्न प्रदेश सरकारसँग सहकार्य थालेको छ ।
उद्योग, वाणिज्य तथा आपूर्ति मन्त्रालयले दशैं, तिहार र छठजस्ता चाडपर्वमा आपूर्ति व्यवस्थालाई प्रभावकारी बनाउन सबै प्रदेश तथा स्थानीय निकायसँग सहकार्य थालेको हो ।
मन्त्रालयले चाडपर्वको समयमा विभिन्न बहानामा उपभोक्तामाथि ठगी हुँदै आएकाले त्यसलाई नियन्त्रण गर्न सातै प्रदेश तथा सबै स्थानीय निकाय सचेत हुनुपर्ने निचोड निकालेको छ । मन्त्रालयमा आयोजित सहकार्यसम्बन्धी जानकारी दिने कार्यक्रममा गण्डकी, कर्णाली, प्रदेश ३ र ५ का उद्योग, पर्यटन तथा वन मन्त्रालयका मन्त्रीस्तरीय प्रतिनिधित्व थियो । साथै, विभिन्न महानगर, उपमहानगर र गाउँपालिकाका प्रतिनिधिहरू पनि सहभागी थिए ।
सोहीअवसरमा उद्योग, वाणिज्य तथा आपूर्तिमन्त्री मातृकाप्रसाद यादवले नजीकिँदै गरेको चाडमा आपूर्ति व्यवस्थालाई सहज बनाउन तीन तहका सरकारको सहकार्य आवश्यक रहेको बताए । उनले उपभोक्तालाई ठगिनबाट जोगाउन केन्द्र, प्रदेश र स्थानीय सरकार लाग्नुपर्नेमा जोड दिए ।
सो प्रयोजनका लागि प्रत्येक स्थानीय तहमा सुपथ मूल्य पसल स्थापना गरिनुपर्ने मन्त्रालयले बताएको छ । त्यसका लागि प्रदेश सरकारले आफ्ना सबै स्थानीय निकायलाई निर्देशन दिनुका साथै सहजीकरण गर्नुपर्नेमा जोड दिइएको छ ।
सबै स्थानीय निकायमा सुपथ मूल्य पसल स्थापना गर्न सके उपभोक्ता ठगिनबाट जोगिने मन्त्रालयको निष्कर्ष छ ।
२०७६ साउन २६ गते प्रकाशित
वि.सं.२०७६ साउन २६ आइतवार १२:४६ मा प्रकाशित