काठमाडौं । नदी नियन्त्रणका लागि तटबन्ध निर्माण नहुँदा प्रत्येक वर्ष बर्खायाममा केशल्या र सिङ्घीया नदीको बाढीका कारण विराटनगर महानगरपालिका जोखिममा पर्दै आएका छन् ।
यस वर्ष पनि समयमा नदी नियन्त्रण गर्ने तटबन्ध निर्माण नहुँदा महानगरपालिकाका ६, ११, १२, १५ र १६ वडा बाढीबाट प्रभावित भएका हुन् । वर्षेनी खेतीयोग्य जमीन कटान गर्ने र बाढीको पानी गाउँशहर पस्ने समस्याको निराकरणका लागि महानगरको पश्चिमतर्फ रहेको केशल्या र पूर्वतर्फ रहेको सिङ्घीया नदीमा तटबन्ध निर्माण गर्नुपर्ने आवश्यकता देखिएको हो ।
केशल्या नदीको तटबन्धका लागि रु चार अर्ब २१ करोड ७० लाख ५६ हजार र सिङ्घीया नदीको तटबन्धका लागि रु एक अर्ब २१ करोड १६ लाख खर्च लाग्ने जल उत्पन्न प्रकोप नियन्त्रण कार्यालय विराटनगरले जनाएको छ ।
विगतमा केशल्या नदीअन्तर्गत केशल्याघाटदेखि सन्ठीयासम्म करीब एक किलोमिटर निर्माण गरिएको तटबन्धको तारजाली तस्करहरुले काटेर लगेपछि झन समस्या उत्पन्न भएको विराटनगर महानगरपालिका–६ का सत्यजीवन चौधरीले बताएका छन् । यी दुबै नदीसँग जोडिएका बस्तीमा पानी पस्न नदिन तटबन्ध गर्नुको विकल्प नभएको स्थानीयवासी राजेश डङ्गोलले जानकारी दिए।
नदी नियन्त्रणका काम दिगो रुपमा हुन नसकेपछि बाढीको समयमा सम्बन्धित कार्यालयले अस्थायी रुपमा गर्ने कामले खासै महत्व नहुने र यसबाट स्थानीय जनता पीडित हुनु परेकाले यसतर्फ सरोकारवाला निकायले समयमै गम्भीर हुनुपर्ने स्थानीयवासीको माग छ । (रासस)
२०७६ साउन २६ गते प्रकाशित
वि.सं.२०७६ साउन २६ आइतवार १३:४६ मा प्रकाशित
