काठमाडौं । चितवनको बकुलहर टाँडिमा रहेको रत्ननगर सामुदायिक अस्पतालमा भदौबाट बिरामी भर्ना सुविधा दिइने भएको छ । पन्ध्र शैयाको सो अस्पतालमा हाल बहिरङ्ग सेवा मात्रै सञ्चालन हुँदै आएको छ ।
अस्पतालका मेडिकल सुपरिटेण्डेण्ट डा. विश्वबन्धु बगालेका अनुसार सो क्षेत्रका बिरामीलाई सुविधा दिलाउने उद्देश्यले सेवा विस्तार गर्न लागिएको हो । अस्पतालमा स्थानीयवासीले धान्याञ्चल महायज्ञ लगाएर निर्माण गरेको एउटा भवन रहेको छ ।
यसैगरी शान्ति मेड नामक गैरसरकारी संस्थाका डा. रुथले हालै रु ६ करोड लगानी गरेर अर्को भवन बनाइदिनु भएको छ । चर्मरोग विशेषज्ञ डा. रुथको नेतृत्वमा अन्य दुई चिकित्सकबाट अस्पतालमा छालाको बहिरङ्ग सेवा सञ्चालन हुँदै आएको छ । दैनिक छालाका मात्रै एक सय बिरामी उपचारका लागि आउने गरेको डा. बगालेको भनाइ छ ।
यससँगै दाँत, प्रसूति र बालबालिकालाई लक्षित गरी बहिरङ्ग सेवा सञ्चालन हुँदै आएको छ । अस्पतालले ४५ जनाको मिर्गौलाको डायलासिससमेत गर्दै आएको छ । अस्पतालमा प्रसूति सेवासमेत सञ्चालन हुँदैआएको छ । मासिक ३० भन्दा बढी महिलाले प्रसूति सेवा लिने गरेको उनले बताए ।
नवजात शिशु उपचार केन्द्रसमेत सञ्चालनमा ल्याउने तयारी गरिएको डा बगालेले बताएका छन् । रत्ननगर नगरपालिकाका प्रमुख नारायण वनले अस्पताललाई प्रदेशस्तरीय अस्पताल बनाउन पहल गरिएको बताए । यस सम्बन्धमा नगर कार्यपालिका बैठकले निर्णय गरी प्रदेशमा पेश गरेको र विभागीय मन्त्रीले निरीक्षणसमेत गरिसक्नुभएको उनले जानकारी दिए ।
कम्तीमा ५० शैयाको अस्पतालको रूपमा स्तरोन्नति गरी पूर्वी चितवनका जनतालाई सेवा दिलाउन नगरपालिका लागिपरेको उनको भनाइ छ । सो क्षेत्रमा रत्ननगरसँगै खैरहनी, राप्ती र कालिका नगरपालिका रहेका छन् । सो अस्पताललाई विस्तार गर्न सके पूर्वी चितवनका चार नगरपालिकावासीलाई सेवा पुग्ने र भरतपुरमा रहेको सरकारी अस्पतालमा विरामीको चाप घट्ने अपेक्षा गरिएको छ ।
२०७६ साउन २६ गते प्रकाशित
वि.सं.२०७६ साउन २६ आइतवार १४:१० मा प्रकाशित