काठमाडौं । सरकारी कार्यालयहरुलाई सेवाग्राहीमुखी बनाउन सरकारले राम्रो कदम चालेको छ । कार्यालय समयमा कर्मचारी बाहिर निस्किदा प्रत्येक महाशाखा र विभागमा अनिवार्य रुपमा लगबुक भर्ने र भराउने गर्नुपर्ने भएको छ । यस्तो व्यवस्था मिलाउन संघीय मामिला तथा सामान्य प्रशासन मन्त्रालयले निर्देशन दिएको हो ।
कार्य सम्पादन सम्झौतालाई कार्यान्वयनमा ल्याउन निर्देशनसंगै सोको पालना गर्न र गराउने बाध्यात्मक अवस्था उत्पन्न भएको प्रवक्ता भुपाल बरालको भनाइ छ । उनका अनुसार सेवाप्रवाह चुस्त बनाउन र जवाफदेहीता बढाउन हरेक महिना बैठक गर्न पनि मन्त्रालयले निर्देशन दिएको छ।
अबदेखि मन्त्रालय र मातहतका निकायले प्रत्येक महिनाको १ गते दिउँसो कामको गतिविधि र प्रभावकारिता सम्बन्धी समीक्षा बैठक राख्न निर्देशन दिइएको मन्त्रालयका शाखा अधिकृत जगतप्रसाद भुसालले जानकारी दिए ।
उक्त बैठकमा शाखा अधिकृतसहित उच्च तहका कर्मचारी अनिवार्य उपस्थित हुनुपर्नेछ । सेवालाई प्रभावकारी बनाउन मन्त्रालयका महाशाखा प्रमुख र विभागका महानिर्देशकले प्रत्येक हप्ताको आइतबार बैठक बोलाउन निर्देशन दिएका छन् ।
२०७६ साउन २७ गते प्रकाशित
वि.सं.२०७६ साउन २७ सोमवार ०९:५४ मा प्रकाशित
