काठमाडौं । शिशु बेचबिखनको आरोपमा नेपाल बाल संगठन, बाल मन्दिर नक्सालका निर्देशक बालकृष्ण डंगोल पक्राउ परेका छन् । साउन १२ गते बर्थिङ सेन्टरमा जन्मिएको शिशुलाई बेलायती नागरिकलाई बेचबिखनको सबै कागजात तयार पारिरहेको अवस्थामा डंगोललाई पक्राउ गरिएको महानगरीय प्रहरी परिसरले जनाएको छ ।
परिसर प्रवक्ता होबिन्द्र बोगटीका अनुसार बर्थिङ सेन्टरसँग समेत मिलेमतो गरी डंगोलले बेलायती नागरिक डोना स्मिथलाई शिशु बिक्री गर्न खोजेका थिए । ‘चार लाख रुपैयाँसमेत लिइसकेको अवस्थामा पक्राउ गरिएको हो,’ प्रवक्ता बोगटीले भने ।
बेलायती नागरिक स्मिथ २६ जुलाईमा नेपाल आएकी थिइन् । डंगोलसँगै प्रहरीले स्मिथलाई पनि मानव बेचबिखन तथा ओसारपसार मुद्दामा अनुसन्धान थालेको छ । ‘अहिले अनुसन्धान भइरहेको छ । बाल मन्दिरमा यस्ता अरू पनि घटना भएका हुन सक्छन् । खोजी गरिरहेका छौं,’ बोगटीले भने । रासस
२०७६ साउन ३० गते प्रकाशित
वि.सं.२०७६ साउन ३० बिहीवार १०:४४ मा प्रकाशित
