काठमाण्डौं । राष्ट्रिय वाणिज्य बैंक भरतपुर महानगरपालिका–१० स्थित चौबीसकोठी चोकमा रहेको भवनमा आज बिहान आगलागी भएको छ । बिहान ७ः३० बजेदेखि लागेको आगो डेढ घण्टामा नियन्त्रणमा आएको जिल्ला प्रहरी कार्यालय चितवनका प्रहरी नायब उपरीक्षक एकनारायण कोइरालाले जानकारी दिनुभयो ।
दुई तले सो भवनको आगलागीबाट तल्लो तलाका अधिकांश सामान जलेर नष्ट भएका छन् । शाखा प्रमुखको कार्यकक्ष जलेर ध्वस्त भएको छ । बैंकको ब्रान्च म्यानेजरको रेष्ट रुममा विजुलीको तार सट भएर ब्रान्च म्यानेजरको रेष्ट रुमका साथै बैंकको एउटा कोठामा क्षति पुगेको चितवन प्रहरीले जनाएको छ ।
यस्तै बैंकको प्रमुख कार्यकारी अधिकृत किरण कुमार श्रेष्ठले आगलागीबाट ठूलो क्षति नभएको बताए । उनले भने, ‘म्याजेरको रुममा विजुलीको तार सट भएको आगलागी भएको हो । त्यस महत्वपुर्ण कागजातहरु थिएन। म्यानेजरको रुम र लबीमा भएका सोफा, कार्पेट, पर्दाहरु जलेको मैले सुचना पाएको छु’ । भरतपुर महानगरपालिका, रत्ननगर नगरपालिकाको दमकल, नेपाल प्रहरी, सशस्त्र प्रहरी, नेपाली सेना र स्थानीयको सहयोगमा आगो नियन्त्रणमा लिइएको हो । आगलागीबाट भएको क्षतिको यकिन विवरण सङ्कलन भइरहेको र त्यस्तो ठूलो क्षति भने भएको छैन ।
विद्युत् सर्ट भएर आगलागी भएको र महत्वपूर्ण कागजात,पैसाको लकर र सर्बर सुरक्षित रहेको सहायक प्रमुख जिल्ला अधिकारी जनकराज पन्तले बताउनुभयो ।
मोबाइल पसलमा आगलागी
यसैगरी चितवनको नारायणगढस्थित लायन्सचोकमा रहेको लायन्स भवनमा आइतबार राति आगलागी भएको छ । आगलागीबाट भवनको भुइ तलामा रहेको गुगल मोबाइल पसलका अधिकांश सामान जलेका छन् । आगलागीबाट भएको क्षतिको यकिन विवरण आउन बाँकी छ । भवनको माथिल्लो तलमा भने कुनै क्षति भएको छैन । तार सर्ट भएर आगलागी भएको इलाका प्रहरी कार्यालय नारायणगढले जानकारी दिएको छ । भरतपुर महानगरपालिकाको दमकल, प्रहरी र स्थानीयले आगो नियन्त्रणमा लिएका थिए । रासस
२०७६ भदौ २ गते प्रकाशित
वि.सं.२०७६ भदौ २ सोमवार १०:४३ मा प्रकाशित
