बागलुङ । बागलुङको गलकोटमा वर्षौदेखि बसोबास गर्दै आएका मुस्लिम समुदायलाई घाट नजिक नहुँदा दाहसंस्कार गर्न समस्या हुने गरेको छ ।
मुस्लिम समुदायमा कसैको निधन भएमा कालीगण्डकीको छेउमा रहेको निरय घाटमा लगिने गरिएको छ । ‘कब्रकस्थान’ (घाट) नजिक नहुँदा मुस्लिम समुदायले शवलाई गलकोटबाट कालिगण्डकीसम्म लैजान ६० हजार भाडा तिर्नुपरेको छ ।
समुदायमा कसैको मृत्यु भएमा आर्थिक जोहो गर्न समस्या हुने गरेको छ । स्थानीय सरकारले घाट व्यवस्थापनका लागि चाँसो नदेखाउँदा मुस्लिम समुदाय समस्यामा परेका छन ।
आर्थिक रुपमा सम्पन्न हुनेले शवलाई कालिगण्डकीसम्म ल्याउने गरेपनि आर्थिक विपन्नता भएकाहरुलाई समुदायले रकम संकलन गरेर दिने गरेको स्थानीय साकिरा बानले बताउनुभयो ।
कुनै समय गाडी नपाउँदा शवलाई बोकेर घाटसम्म ल्याउनुपरेको मुस्लिम समुदायका स्थानीय रहमद हकिमले बताउनुभयो । मुस्लिम समुदायका शवलाई व्यवस्थापन गर्न जग्गाको व्यवस्था गर्नुपर्ने भएपनि समस्या उस्तै छ ।
घाट व्यवस्थापन नभएपछि बागलुङमा बसोबास गर्ने मुस्लिम समुदायले बेला–बेला सास्ती व्यहोर्नुपरेको छ । यसको उचित व्यवस्थापन गर्न उनीहरुले स्थानीय सरकारसँग माग गरेका छन ।
२०७६ भदौ ४ गते प्रकाशित
वि.सं.२०७६ भदौ ४ बुधवार ०९:५० मा प्रकाशित