बाँके । नेपालगन्ज भन्सार कार्यालयमा लिलामी नहुँदा वर्षौंदेखि लाखौं मूल्यका सवारी साधनहरू थन्किएका छन ।
भन्सार तथा प्रहरीले अवैध रूपमा नियन्त्रणमा लिएका करिब २ सय ५० थान मोटरसाइकल र दुइटा जिपको मूल्यांकन गर्न ढिलाइ भएका कारण लिलाम प्रक्रिया सुरु नभएको हो ।
करिब पाँच वर्ष अघिदेखि नियन्त्रणमा लिएका चोरीका सवारी साधनहरू अझै लिलाम बिक्री हुन नसक्दा भन्सार कार्यालय परिसरमा थन्काइएका ती सवारी साधनहरू जीर्ण भएर काम नलाग्ने अवस्थामा पुगेका छन ।
यातायात व्यवस्था कार्यालयको समन्वयमा मेकानिकल इन्जिनियरले बरामद सवारी साधनको मूल्यांकन र रकम तोकेपछि लिलाम हुने व्यवस्था छ । तर, कर्मचारी अभावको कारण जनाउँदै मूल्यांकन कार्य गर्न ढिलाइ भएको जनाइएको छ ।
समयमै लिलाम गरेको भए ती सवारी साधनबाट २ करोड रुपैयाँ राजस्व उठ्ने अनुमान नेपालगन्ज भन्सार कार्यालयको छ ।
२०७६ भदौ ४ गते प्रकाशित
वि.सं.२०७६ भदौ ४ बुधवार १४:०० मा प्रकाशित
