काठमाडौं । सरकारी स्वामित्वको नेपाल टेलिकमको नाफा गत आर्थिक वर्ष (आव) मा पछिल्ला ९ वर्षयताकै न्यून रह्यो ।
आव ७४/७५ मा १७ अर्ब ४८ करोड कमाएको टेलिकमको नाफा आव ७५/७६ मा सात अर्बले घटी १० अर्ब २० करोड रुपैयाँमा सीमित भएको छ ।
आफ्नो प्रतिस्पर्धी निजीक्षेत्रको एनसेलले सेवा विस्तार गर्नुका साथै कमाइ पनि बढाइरहँदा टेलिकम भने दुवैमा पछाडि पर्दै गएको छ । गत आवमा मोबाइल सेवा नवीकरण शुल्कका रूपमा अर्बौं रुपैयाँ सरकारलाई बुझाउनु पर्दा र कर्पोरेट करको दर बढ्न जादा नाफा खुम्चिन पुगेको टेलिकमको भनाइ छ।
टेलिकमले आफ्नो मोबाइल सेवा अनुमति नवीकरणका लागि प्रत्येक ५ वर्षमा २० अर्ब रुपैयाँ तिर्नुपर्ने हुन्छ । गत आवमा त्यसकै एक किस्ताबापत ४ अर्ब र कर्पोरेट कर शीर्षकमा १ अर्ब सरकारलाई बुझाएको थियो ।
यसका साथै फेसबूक, ह्वाट्सएप, भाइबर जस्ता सामाजिक सञ्जालमार्फत अन्तरराष्ट्रिय र आन्तरिक भ्वाइस कल गर्ने चलन बढेकाले पनि टेलिकमको आम्दानी दुष्प्रभावित भएको टेलिकमका प्रबन्ध निर्देशक डिल्लीराम अधिकारी बताउनुभएको छ ।
वि.सं.२०७६ भदौ ५ बिहीवार ०८:१५ मा प्रकाशित