बागलुङ । नेपाल पत्रकार महासंघ बागलुङ शाखाको भवनमा अज्ञात समूहले तोडफोड गरेको छ ।
महासंघको निर्माणाधिन सभाहलको युपिविसी तोडफोड गरिएको छ भने पानीको मोटर, बिजुलीको मिटर बक्स, एमसिपी र इन्टरनेटको तार काटेर टुक्रा टुक्रा पारिएको महासंघले जनाएको छ ।
पछिल्लो तीन साताको शनिवारका दिन तार एकै साथ काटिदिने र भवनमा तोडफोड गर्ने कार्य निरन्तर भइरहेको नेपाल पत्रकार महासंघ बागलुङ शाखाका सचिव राम थापाले बताउनुभयो । यसबारेमा शुरुवातमै जिल्ला प्रहरी कार्यालयमा मौखिक जानकारी गराएर ध्यानाकर्षण गराइएको उहाँले जानकारी दिनुभयो ।
‘अहिलेको तोडफोड क्षतिका हिसावले ठुलो होइन, तर पत्रकारहरुको साझा संस्थामाथिको लगातारको घटनाले सांकेतिक आक्रमण हो कि भन्ने हिसावले हामीले संवेदनशील हिसावले लिएका छौँ,’ सचिव थापाले भन्नुभयो,‘प्रहरी कार्यालयकै सम्मुखमा भएको यस किसिमको घटनाले प्रहरी स्वयंम्लाई पनि प्रश्न उठेको छ, तोडफोडमा सम्लग्नको खोजी र अबका दिनमा प्रहरी निगरानी बढाउने बिषयमा गम्भिरता देखिन जरुरी छ ।’
महासंघले भवन आसपासमा काँडेतारले तारबार गरेको छ ।
जिल्ला प्रहरी कार्यालयका प्रहरी प्रमुख नवराज भट्टले महासंघ भवनमा रातिको समयमा भएको तोडफोडका बिषयमा मौखिक जानकारी आएको र यस विषयमा आवश्यक अनुसन्धान जारी राखिएको बताउनुभयो ।
यस्तो किसिमको घटना हुन नदिन बजारमा सिसी क्यामेरा जडानका लागी आग्रह गरिएको र घटना दोहोरिन नदिनका लागी आवश्यक निगरानी बढाउने प्रहरी उपरिक्षक भट्टले बताउनुभयो ।
२०७६ भदौ ६ गते प्रकाशित
वि.सं.२०७६ भदौ ६ शुक्रवार ०९:४५ मा प्रकाशित
