काठमाडौं । सूर्या लाइफ इन्सुरेन्सको आइतबार (भदौ ८ गते) बाट ७० प्रतिशत हकप्रद सेयर खुल्ने भएको छ । कम्पनीले प्रतिकित्ता १०० रुपैयाँ दरले १०ः७ अनुपातमा ८८ लाख ७४ हजार ९६ कित्ता हकप्रद सेयर बिक्री गर्न लागेको हो ।
असोज १२ गतेसम्म यस हकप्रदमा आवेदन दिन सकिनेछ । साउन २८ गतेसम्म मात्र कायम सेयरधनीले आवेदन दिन पाउनेछन । यसमा एनआइसी एसिया क्यापिटलले बिक्री प्रबन्धकको काम गर्नेछ ।
सूर्या लाइफले हाल कायम १ अर्ब १३ करोड १९ लाख रुपैयाँ पुँजीको १०ः७ अनुपातमा ७९ लाख २३ हजार ३०० कित्ता हकप्रद सेयर निष्कासन गर्न लागेको हो ।
कम्पनीले यही पुँजीबाट अघिल्लो वर्षको नाफाबाट १२ प्रतिशत बोनस वितरण पनि गरिसकेको छ । १२ प्रतिशत बोनस र ७० प्रतिशत हकप्रदपछि चुक्ता पुँजी २ अर्ब ६ करोड ५८ हजार रुपैयाँ पुग्नेछ । सूर्याले बिमा समितिले तोकेको न्यूनतम २ अर्ब रुपैयाँ चुक्ता पुँजी पुर्याउन हकप्रदको बाटो रोजेको हो ।
रेटिङ एजेन्सी केयर रेटिङ नेपालले सूर्याको हकप्रदलाई औसत भन्दा कमजोर आधार जनाउने ‘केयर एनपी ग्रेड ४’ रेटिङ दिएको छ ।
यसमा बिक्री प्रबन्धक एनआइसी एसिया क्यापिटल बबरमहल काठमाडौं तथा आस्वा सदस्य बैंक तथा वित्तीय संस्थाबाट आवेदन दिन सकिनेछ ।
त्यस्तै, सूर्याको वीरगञ्ज, नारायणघाट, विराटनगर, धरान र बुटवल शाखाबाट पनि आवेदन दिन सकिनेछ । पोखरा, सुर्खेत र महेन्द्रनगर शाखाबाट पनि आवेदन दिने व्यवस्था छ ।
२०७६ भदौ ८ गते प्रकाशित
वि.सं.२०७६ भदौ ८ आइतवार ०७:५० मा प्रकाशित
