काठमाण्डौ । नेपाल राष्ट्रबैंकले यसपालीको दशैँमा नयाँ नोट नछाप्ने योजना बनाएको छ । नयाँ नोट वर्षदिनमै झुत्रा हुने भएपछि बैंकले यो वर्ष केही दरका नयाँ नोट नछाप्ने योजाना बनाएको हो ।
बैंकले विशेषगरि दशैँमा धेरै प्रयोग हुने १०, २० र ५० रुपैयाँ दरका नोट नयाँ नछाप्ने र गोदामका रहेका सुकिला नोट प्रयोग गर्ने तयारी गरेको छ ।
५, १००, ५०० र १००० दरका नोट भने नयाँ छपाइ गरिने राष्ट्रबैंकले जनाएको छ । वर्षेनी दशैँमा नोट छपाइमा मात्रै १ अर्ब रुपैयाँभन्दा धेरै खर्च गर्दै आएको छ ।
अघिल्लो वर्षको दशैँमा पनि नेपाल राष्ट्रबैंकले ७९ करोड रुपैयाँ खर्च गरेको थियो । हरेक वर्ष नोट मैलो हुँदा र च्यातिँदा राष्ट्रबैंकले छपाइको लागि ठूलो मात्रामा पैसा खर्च गर्दै आएको छ ।
नेपालमा नोटको सुरक्षामा ध्यान नदिँदा वर्षेनी करोडौँ रुपैयाँ खर्च भैरहेको भन्दै राष्ट्रबैंकले नागरिकस्तरमा कसरी पैसा सफा राख्ने, कसरी कच्याककुचुक नपार्ने लगायतका जनचेतना दिने प्रयास गरिरहेको छ ।
तर पनि पैसामा केरकार गर्ने, फोहोर गर्ने, कच्याककुचुक पार्नेलगायतका समस्या हटेका छैनन ।
हेर्दा नयाँजस्ता देखिने विभिन्न दरका नोट गोदाममा भएकाले यो दशैँमा नयाँ नोट नछापेर सुकिला नोटले काम चलाउनेबारे छलफल भैरहेको राष्ट्रबैंकका कार्यकारी निर्देशक लक्ष्मीप्रपन्न निरौलाले जानकारी दिनुभयो ।
२०७६ भदौ ८ गते प्रकाशित
वि.सं.२०७६ भदौ ८ आइतवार १०:५९ मा प्रकाशित
