काठमाडौं । नेपाल राष्ट्र बैंकले भोलि भदौ ९ गते सोमबार ४ अर्ब रुपैयाँ भन्दा धेरैको ट्रेजरी बिल बिक्री गर्ने भएको छ ।बजारमा तरलता सन्तुलन राख्न ट्रजरी बिल बिक्रीमार्फत ४ अर्ब २३ करोड ३२ लाख रुपैयाँ आन्तरिक ऋण उठाउन लागेको हो ।
बोलकबोल मार्फत बिक्री गर्न लागेको उक्त ट्रेजरी बिलमा सोमबार मध्याह्न ३ बजेसम्म अनलाईन विडिङ्ग प्रणाली मार्फत बोलकबोल गर्न सकिने केन्द्रीय बैंकले जनाएको छ ।
भदौ १० गते मंगलबार जारी हुने ट्रेजरी बिलको बोलकबोलमा बैंक तथा वित्तीय संस्था, संगठित संस्था तथा सर्वसाधारण नागरिक समेत सहभागी हुन सक्नेछन ।
राष्ट्र बैंकले बिक्री गर्न लागेको मध्ये ९१ दिन अवधिको २ अर्ब २३ करोड ३२ लाख रुपैयाँ बराबरको ट्रेजरी बिल २०७६ मंसिर १० गते परिपक्क हुनेछ भने ३६४ दिन अवधिको २ अर्ब रुपैयाँ बराबरको ट्रेजरी बिल २०७७ भदौ ९ गते परिपक्क हुनेछ ।
ट्रेजरी बिल एक वर्ष वा एक वर्षभन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो । सरकारलाई आवश्यक पर्ने अल्पकालीन अवधिको स्रोत जुटाउन यो बिल बिक्री गरिन्छ ।
सबै वर्गका बैंक तथा वित्तीय संस्था, संगठित संस्था तथा सर्वसाधारण नागरिक समेत ट्रेजरी बिलको बोलकबोलमा सहभागी हुन सक्नेछन । बोलकबोलमा सबैभन्दा बढी मूल्य उल्लेख गर्ने संस्थालाई पहिलो प्राथमिकतामा राखेर क्रमैसँग आह्वान रकमसम्म ट्रेजरी बिलको बाँडफाँड गरिने राष्ट्र बैंकले जनाएको छ ।
केन्द्रीय बैंकले यसअघि भदौ २ गते ९१ दिन अवधिको २ अर्ब रुपैयाँको ट्रेजरी बिल बिक्री गरेको थियो । जसमा अधिकतम १.२३९८ र न्युनतम १.२३९८ डिस्काउण्टदर कायम भएको थियो।
२०७६ भदौ ८ गते प्रकाशित
वि.सं.२०७६ भदौ ८ आइतवार १२:५२ मा प्रकाशित