काठमाडौं । प्रगतिशील युवा नेपालले सर्वाधिक धनराशिको खुला पुरुष भलिबल प्रतियोगिता आयोजना गर्ने भएको छ ।
आयोजकले बुधबार स्वर्गीय प्रकाश दाहालको स्मृतिमा राजधानीमा भदौ २४ देखि २८ गतेसम्मे ‘प्रथम प्रकाश दाहाल स्मृति प्रगतिशील युवा नेपाल कप’ राष्ट्रिय खुला पुरुष भलिबल प्रतियोगिता गराउने जानकारी गराएको हो ।
नयाँ बसपार्कस्थित ढोरपाटन क्लबको खेल मैदानमा हुने प्रतियोगिताको विजेताले ५ लाख रुपैयाँ हात पार्नेछ । जुन पुरुष भलिबलमा सर्वाधिक धनराशि हो ।
दोस्रो हुनेले ३ लाख, तेस्रोले १ लाख र चौथोले ५० हजार रुपैयाँ हात पार्नेछन । प्रतियोगिताको सर्वाेत्कृष्ट खेलाडीले एक थान मोटरसाइकल हात पार्नेछ भने स्पाइकर, ब्लकर, डिफेन्डर, सर्भर र प्रशिक्षकले जनही १०/१० हजार रुपैयाँ हात पार्ने आयोजकले जनाएको ।
प्रतियोगितामा तीन विभागीयसहित १० भन्दा बढि समुहको सहभागिता रहने छ । प्रतियोगिताको खर्च करिब ३८ लाख ५० हजार रुपैयाँ रहने आयोजकको अनुमान छ ।
प्रतियोगिताको उद्घाटन पूर्वप्रधानमन्त्री तथा नेकपाका अध्यक्ष पुष्पकमल दाहालले गर्ने तय भएको छ ।
२०७६ भदौ १२ गते प्रकाशित
वि.सं.२०७६ भदौ १२ बिहीवार ०९:४९ मा प्रकाशित