काठमाडौं । निर्वाचन आयोगले उपनिर्वाचनको लागि दल दर्ताका लागि आव्हान गरेको छ । आयोगले आउँदो मंसिर १४ गते हुने संघ, प्रदेश र स्थानीय तहको उपनिर्वाचनकाल लागि दल दर्ता आव्हान गरेको हो ।
विभिन्न कारणले रिक्त रहेका संघ, प्रदेश र स्थानीय तहको ५१ पदमा मंसिर १४ गते उपनिर्वाचन हुँदैछ ।निर्वाचन आयोगले २०७४ सालमा सम्पन्न संघ, प्रदेश र स्थानीय तहको निर्वाचनमा भाग लिएका राजनीतिक दल बाहेकलाई उपनिर्वाचनको प्रयोजनका लागि दल दर्ताका लागि आह्वान गरेको हो ।
आयोगका प्रवक्ता शंकरप्रसाद खरेलले २०७४ सालको निर्वाचनमा भाग लिएका राजनीतिक पार्टीले भने दल दर्ता गर्नु नपर्ने बताउनुभयो । आयोगका अनुसार तत्कालीन एमाले र माओवादी केन्द्र एकीकरणबाट बनेको नेकपाले भने उपनिर्वाचनको प्रयोजनका लागि दल दर्ता गर्नुपर्छ । आयोगले दल दर्ताको लागि भदौ मसान्तसम्म म्याद दिएको छ ।
दल दर्ताका लागि राजनीतिक दलले आफ्नो वार्षिक लेखा परीक्षण प्रतिवेदन अनिवार्य रुपमा बुझाउनुपर्ने आयोगले जनाएको छ । दर्ता गर्दा राजनीतिक पार्टीले आफ्नो विधान, नियमावली, घोषणा पत्र, निर्वाचन चिन्ह पनि निवेदनसँगै पेश गर्नुपर्ने आयोगले उल्लेख गरेको छ ।
२०७६ भदौ १६ गते प्रकाशित
वि.सं.२०७६ भदौ १६ सोमवार १६:५८ मा प्रकाशित