काठमाडौं । निजी क्षेत्रको यातायात सेवा प्रदायक कम्पनी सुन्दर यातायातले विद्युतीय सवारी साधनको चार्जिङ स्टेसन सञ्चालनमा ल्याएको हो ।
काठमाडौंको चावहिलस्थित उक्त चार्जिङ स्टेसनको ऊर्जा, जलस्रोत तथा सिँचाइ मन्त्रालयका सचिव दिनेशकुमार घिमिरेले मंगलबार उद्घाटन गर्नुभयो ।
कम्पनीले भदौ २३ गतेदेखि राजधानीमा चारवटा विद्युतीय बस चलाउने तयारी गरेको छ । कम्पनी अध्यक्ष भेषबहादुर थापाले उक्त चार्जिङ स्टेसनमा एकपटक ६ वटासम्म सवारी साधन चार्ज गर्न सकिने बताउनुभयो ।
बिजुलीले सवारी साधनको इन्धन खर्च चार गुणासम्म घटाउने उहाँले जानकारी दिनुभयो । थापाका अनुसार अहिले राजधानीमा चल्ने सार्वजनिक बसले दिनमा चार हजार रुपैयाँ जतिको डिजेल खान्छ। विद्युतीय सवारी साधनले सात सय रुपैयाँ बराबरको बिजुली मात्र खपत गर्छ ।
प्रतियुनिट चार रुपैयाँ २० पैसामा विद्युतीय सवारी साधन चार्ज गर्ने व्यवस्था मिलाइएको थापाले जानकारी दिनुभयो । लामो समयको प्रयासपछि आफूहरुले वातावरणमैत्री बस सञ्चालनमा ल्याउन लागेको थापाले बताउनुभयो । कम्पनीले एक करोड ६२ लाख रुपैयाँ पर्ने विद्युतीय बस सञ्चालनमा ल्याउन लागेको छ ।
६ वर्षभित्र कम्पनी नाफामा जान सक्ने उहाँको भनाई छ । कम्पनीले सुकेधारा र सीतापाइलामा पनि चार्जिङ स्टेसन निर्माण गरिसकेको जनाएको छ । निकट भविष्यमै प्रदेश ५ को बुटवल र प्रदेश १ को विराटनगरमा विद्युतीय बस सञ्चालनमा ल्याउने कम्पनीको तयारी छ।
उक्त चार्जिङ स्टेसनमा चार घन्टामा सवारी साधन चार्ज हुन्छ । सुपर चार्जिङ मेसिन राखेकोले सबै प्रकारका विद्युतीय सवारी साधनका लागि उपयुक्त हुन्छ । -रासस
२०७६ भदौ १८ गते प्रकाशित
वि.सं.२०७६ भदौ १८ बुधवार ०९:३२ मा प्रकाशित