काठमाडौं । लगानीकर्ता तथा सरकारबीच लामो समयको विवाद, आरोप प्रत्यारोप तथा शंकापछि सीडीएस एन्ड क्लियरिङ लिमिटेडले (सीडीएससी) भारित औसत लागत विधिबाट पुँजीगत लाभकर गणना गर्नको लागि नयाँ सफ्टवेयरको परीक्षण सुरु गरेको छ ।
सीडीएससीले सोमबारदेखि अनलाइनबाटै पुँजीगत लाभकर घोषणा र गणना गर्न सकिने सफ्टवेरको परीक्षण सुरु गरेका जनाएको हो ।
एक प्रेस विज्ञप्ति जारी गर्दै सीडीएससीले सिस्टम निर्माणको काम अन्तिम चरणमा पुगेको र सोमबारबाट नै परीक्षणका लागि खुला गरिएको जनाएको छ ।
परीक्षणकालमा लगानीकर्ताले आफूले होल्ड गरेको सेयरको लाभकर गणना गर्न सक्नेछन् भन्दै कम्पनीले त्यसलाई आधिकारिक भने मानि नहाल्ने जनाएको छ । सफ्टवेरको परीक्षण सकिएर आधिकारिकरुपमा काम हुन भने अझै केही समय लाग्ने पनि सीडीएससीले जनाएको छ ।
यो प्रणालीको सुरुवात भएपछि ग्राहकलाई ब्रोकर कार्यालयमा गएर लागतमा सहिछाप गर्नुपर्ने अवस्था अन्त्य हुनेछ तर सीसीएससीको सिस्टममा केही खराबी आयो वा अन्य कारणले सीडीएससीको रेकर्डमा रहेको लागत कम वा बढी हुन गयो भने चाहिँ त्यसबाट हुनजाने नोक्सान वा सरकारी कारबाहीको भागिदार भने स्वयम् लगानीकर्ता नै हुनुपर्ने व्यवस्था गरिएको छ ।
हाल मेरो सेयर प्रयोग गरिरहेका साढे ५ लाख हाराहारीमा रहेका लगानीकर्ताहरूले यसको परीक्षण गर्न सक्नेछन ।
२०७६ भदौ १८ गते प्रकाशित
वि.सं.२०७६ भदौ १८ बुधवार १३:४९ मा प्रकाशित
