काठमाडौं । चाडपर्वलाई लक्षित गरेर आजदेखि उपत्यकासँगै उपत्यका बाहिरका विभिन्न स्थानमामा सहुलियत पसल सञ्चालन हुँदैछन । चाडपर्वमा उपभोक्तालाई राहत दिनका लागि सरकारले सहुलियत पसल सञ्चालन गर्न लागेको हो ।
उद्योग,वाणिज्य तथा आपूर्ति मन्त्रालयको संयोजनमा साल्टट्रेडिङ कर्पाेरेसन, खाद्य व्यवस्था तथा व्यापार कम्पनी र दुग्ध विकास संस्थान (डीडीसी) ले सहुलियतमा सामान उपलव्ध गराउने छन ।
उपत्यकासँगै मुलुकभर ७३ ठाउँमा सहुलियत पसल सञ्चालन गर्न लागिएको मन्त्रालयले जानकारी दिएको छ । चाडपर्वमा बजारमा अस्वाभाविक मूल्यवृद्धि भइ उपभोक्ता ठगिनसक्ने भन्दै बजार मूल्य नियन्त्रण गर्नका लागि सहुलियत पसल सञ्चालन गर्न लागेको मन्त्रालयले जनाएको छ ।
कालीमाटी, कोटेश्वर, टेकु, सिंहदरबार, सतुंगल, भक्तपुर र ललितपुरमा सहुलियत पसल सञ्चालन गरिने मन्त्रालयले जनाएको छ ।
उपत्यकाभन्दा बाहिरी जिल्लामा नेपाल खाद्य संस्थान र साल्ट्र टेडिङ कर्पाेरेसनको कार्यालयबाट सुपथ मूल्यमा दैनिक उपभोग्यका सामान वितरण गरिने बताइएको छ ।
निजी क्षेत्रका व्यवसायीलाई पनि सहुलियत दरमा दैनिक उपभोग्य वस्तु वितरण गर्न निर्देशन दिइएको मन्त्रालयले जानकारी दिएको छ ।
सहुलियत पसलमा मोटा चामल, प्रतिकेजी पाँच, मसिनो चामलमा प्रतिकेजी १० रुपैयाँ, चिनी प्रतिकेजीमा पाँच, खसीबोका प्रतिकेजीमा १०रुपैयाँ र नुन प्रतिकेजीमा दुई रुपैयाँ छुट दिइने छ ।
डीडीसीले प्रतिकिलो घ्यूमा ५० रुपैयाँ र पनिरमा १० रुपैयाँ छुट दिने छ । सरकारले सहुलियत पसल सञ्चालन गर्नका लागि गत वर्षदेखि बजेटमै रकमको व्यवस्था गर्दै आएको छ ।
यो वर्ष सहुलियत पसल सञ्चालन गर्नका लागि ३ करोड २५ लाख रुपैयाँ छुट्याएको मन्त्रालयले जानकारी दिएको छ । खाद्य संस्थानको लागि १ करोड ७५ लाख र साल्ट्र टे«डिङ कर्पाेरेशनको लागि १ करोड ५० लाख रुपैयाँ विनियोजन गरिएको छ ।
चाडपर्वमा बजारमा किनमेल बढी हुने हुँदा बजारका कृत्रिम अभाव कालोबजारी हुन सक्ने भन्दै त्यसलाई नियन्त्रण गर्नका लागि सरकारले प्रत्येक वर्ष सहुलियत पसल सञ्चालन गर्दै आएको छ ।
चाडपर्वमा बजारका बढी चहलपहल हुने हुँदा व्यवसायीले मनपरी मूल्य लिई उपभोक्ता ठग्ने गर्छन् । त्यसलाई नियन्त्रण गर्नका लागि सरकारले सुपथ पसल सञ्चालन गर्न लागेको हो ।
२०७६ भदौ २३ गते प्रकाशित
वि.सं.२०७६ भदौ २३ सोमवार ०९:४४ मा प्रकाशित