काठमाडौं । नेपाल शिन क्योकुशिन कराते संघ गुर्जधारा शाखाको आयोजनामा “दोस्रो चन्द्रागिरी मेयर कप तथा दशौं राष्ट्रिय शिन क्योकुसिन कराते प्रतियोगिता” काठमाडौंको गर्जुधारामा हुने भएको छ ।
बुधबार राजधानीको त्रिपुरेश्वरमा आयोजित पत्रकार सम्मेलनका क्रममा प्रतियोगिता भदौंको २७ र २८ गते हुने आयोजक संस्थाका अध्यक्ष विक्रम नकर्मीले जानकारी दिए । अध्यक्ष नकर्मीका अनुसार पुरुषतर्फ ७ र महिलातर्फ २ गरि कुल ७ तौल समूहमा प्रतियोगिता हुनेछ ।
प्रतियोगितामा विभिन्न २२ जिल्लाका १७५ जना खेलाडीहरुको सहभागीता रहने बताइएको छ । प्रतियोगिताका प्रथम, द्वितीय र तृतिय हुने खेलाडी तथा पुरुष र महिला तर्फ उत्कृष्ट खेलाडीलाई नगद सहित शिल्ड प्रदान गरिने अध्यक्ष नकर्मीले जानकारी दिए । त्यसैगरि, फुल कन्ट्र्याक्ट कराते प्रतियोगिताको ईतिहास मै पहिलोपल्ट प्रत्येक खेलाडीलाई २ लाख रुपैया सम्मको खेलाडी बीमा गरिएको आयोजक संस्थाका संरक्षक कुमार श्रेष्ठले जानकारी दिए ।
प्रतियोगिताको उद्घाटन प्रदेश ३ का सभामुख सानुकुमार श्रेष्ठले र समापन चन्द्रागिरि नगरपालिकाका नगर प्रमुख घनश्याम गिरीले गर्नुहुने कार्यक्रम रहेको छ।
२०७६ भदौ २५ गते प्रकाशित
वि.सं.२०७६ भदौ २५ बुधवार २१:३७ मा प्रकाशित