काठमाडौं । आगामी मंसिर १४ मा हुने उपनिर्वाचनका लागि चार लाख ४७ हजार सात सय ९२ मतदाताले नाम दर्ता गराएका छन ।
निर्वाचन आयोगले मतदाताको नामावली दाबी विरोधका लागि सम्बन्धित जिल्लामा पठाएको छ । मतदाता नामावलीमा दाबी विरोधका लागि १ देखि १० असोजसम्मको समय छुट्याएको छ ।
मतदाता नामावली ऐन २०७३ को दफा १३ बमोजिम दाबी विरोधको कार्यतालिका सार्वजनिक गरिएको आयोगका प्रवक्ता सहसचिव शंकरप्रसाद खरेलले जानकारी दिनुभयो ।
प्रतिनिधिसभा सदस्य, प्रदेश सभा सदस्य र स्थानीय तहका पदाधिकारीसमेत ५१ पदका लागि ३७ जिल्लाका एक सय ५४ वडामा उपनिर्वाचन हुँदै छ ।
ती वडा कार्यालयमा रहने सहायक नाम दर्ता अधिकारीको कार्यालयमा मतदाता नामावलीमा दाबी विरोध गर्न सकिने आयोगले जनाएको छ ।
आयोगले सम्बन्धित वडाका मतदातालाई आ–आफ्नो वडा कार्यालयमा सम्पर्क गरी मतदाता नामावलीमा रहेका त्रुटि सच्याउने, उजुरी दिने, दोहोरो नाम हटाउने, मृत्यु भएका, नागरिकता रद्द/त्याग गरेका मतदाताका नाम हटाई शुद्ध मतदाता नामावली तयार गर्ने कार्यमा सहयोग गर्न आग्रहसमेत गरेको छ ।
२०७६ भदौ २६ गते प्रकाशित
वि.सं.२०७६ भदौ २६ बिहीवार ०७:५७ मा प्रकाशित
