काठमाडौं । पुँजी छरिएर रहेकाले नेपाली बैंकले बृहत् लगानी गर्न नसकेको भन्दै वाणिज्य बैंकहरूको चुक्ता पुँजी कम्तीमा १६ अर्ब रुपैयाँ र्पुयाउन विश्व बैंकको प्रतिवेदनले सुझाएको छ ।
विश्व बैंकले शुक्रबार जारी गरेको ‘नेपालको पूर्वाधार क्षेत्रको मूल्यांकन प्रतिवेदन’मार्फत यस्तो सुझाब दिएको हो । पुँजी छरिएर रहेकाले नेपाली बैंकले क्षमताभन्दा पनि कम लगानी गरिरहेको भन्दै बैंकहरूको क्षमता विस्तारका लागि पुँजी वृद्धि आवश्यक भएको विश्व बैंकले उल्लेख गरेको छ ।
‘१४औँ योजनाअनुसार विकासका लागि २४ खर्ब २५ अर्ब लाग्ने भनिएको छ,’ प्रतिवेदनमा उल्लेख छ, ‘यसका लागि निजी क्षेत्रबाट मात्रै ५५ प्रतिशत लगानी हुने अनुमान गरिएको छ ।
यसमा वैदेशिक लगानीकर्ता र नेपाली बैंक तथा वित्तीय संस्थाको भूमिका महत्वपूर्ण हुन्छ ।’ वाणिज्य बैंकहरूले चुक्ता पुँजी १६ अर्ब र्पुयाउनुपर्ने र यसको माध्यम मर्जरलाई बनाइनुपर्ने प्रतिवेदनमा औँल्याइएको छ । उसले संख्या तोकेरै वाणिज्य बैंकलाई २८ बाट १५ मा झार्नुपर्ने सुझाब दिएको छ ।
बैंकहरू समायोजनको यो क्रममा मध्यमकालीन अवधिमा पूरा हुने गरी कम्तीमा १० नेपाली बैंकमा वैदेशिक साझेदार भित्रयाउनुपर्ने सुझाब विश्व बैंकको छ ।
राष्ट्र बैंकले पनि बैंक तथा वित्तीय संस्थाहरूको संख्या घटाउन खोजिरहेको छ । संख्या नतोकिए पनि मर्जरमा जान बैंकहरूलाई प्रोत्साहन गरिने मौद्रिक नीतिमै उल्लेख छ । -नयाँ पत्रिकामा समाचार छ ।
२०७६ भदौ ३१ गते प्रकाशित
वि.सं.२०७६ भदौ ३१ मंगलवार ०८:२३ मा प्रकाशित
