काठमाडौं । नेपाल राष्ट्र बैङ्कमा मर्जरको प्रगति विवरण बुझाउने बैङ्कहरुको सङ्ख्या १८ पुगेको छ । राष्ट्र बैङ्कले वाणिज्य बैङ्कहरुलाई मर्जरको प्रगति विवरण गत भदौ २५ गतेसम्म बुझाउन समय दिएको थियो ।
तर, निर्धारित समयसम्म सबै वाणिज्य बैङ्कहरुले मर्जरको प्रगति विवरण बुझाएका छैनन । नेपाल बैङ्क, नबिल बैङ्क, हिमालयन बैङ्क, माछापुच्छ्रे बैङ्क, कुमारी, लक्ष्मी, ग्लोबल आइएमई, सिटिजन्स, प्राइम, सनराइज, एनएमबीलगायतका १८ ओटा बैङ्कले मर्जरको प्रगति विवरण बुझाएको राष्ट्र बैंकले जनाएको छ ।
प्रगति विवरण नबुझाउने बैङ्कलाई पनि तुरुन्तै विवरण बुझाउन बैंक निर्देशन दिइएको छ । बैङ्कहरुले मर्जरको प्रगति बुझाए पनि वास्तवमा प्रगति भने भएको देखिँदैन ।
राष्ट्र बैङ्कमा जति पनि बैङ्कले मर्जरको प्रगति विवरण बुझाएका छन, ती विवरणमा कुनै पनि बैङ्कले आफ्नो जोडी खोजेर मर्जरका लागि छलफल गरेको भन्ने उल्लेख छैन ।
मौद्रिक नीतिअघि मर्जरको प्रतिबद्धता बुझाउँदा मर्जरमा जान तयार रहेको भन्ने मात्रै प्रतिबद्धता बुझाएका थिए । प्रतिबद्धता बुझाउँदा मर्जरमा जाने जोडी भने खोजिसकेका थिएनन । त्यसैगरी, प्रगति विवरणमा पनि मर्जरको कुनै प्रगति भएको देखिँदैन ।
मौद्रिक नीतिअघि २२ ओटा बैङ्कले मात्रै मर्जर प्रतिबद्धता बुझाएका थिए । मौद्रिक नीतिमा बिग मर्जर नआएपछि राष्ट्र बैङ्कले मर्जरको प्रगति कति भयो भनेर बैङ्कलाई पुनःविवरण बुझाउन भनेको थियो ।
२०७६ भदौ ३१ गते प्रकाशित
वि.सं.२०७६ भदौ ३१ मंगलवार ०९:५६ मा प्रकाशित