काठमाडौं । दशैं मान्न घर जाने योजनामा रहेका उपल्यका बासिले नजिकको प्रहरीलाई जानकारी गराएर मात्र घर छाड्नु पर्ने भएको छ ।
काठमाडौं उपत्यकामा घर भएर दशैंका बेला पुर्ख्यौली घर जाने व्यक्तिले घर छाडेर जानेबेला प्रहरीलाई खबर गर्नुपर्ने भएको हो ।
दशैं, तिहार तथा छठ पर्वका लागि महानगरीय प्रहरी परिसर काठमाडौंले तयार पारेको सुरक्षा योजनामा दशैंका बेला काठमाडौं बाहिर जाने घरधनीहरुले अनिवार्य रुपमा नजिकको प्रहरी कार्यालयलाई जानकारी गराउनुपर्ने व्यवस्था गरेको छ ।
चाडपर्व मनाउन काठमाडौंको घर छाडेर पुर्ख्यौली घर जाँदा घरमा चोरी लगायतका घटना हुने भएकाले सबै घरधनीहरुले आफूहरुलाई घर छाडेर गएको जानकारी दिन प्रहरीले अनुरोध गरेको छ ।
यसका साथै, घरमा काम गर्ने कामदार र सुरक्षाका लागि मानिस राखिएको छ भने ति व्यक्तिबारे पनि जानकारी दिन प्रहरीले अनुरोध गरेको छ ।
‘चाडपर्व मनाउन पुर्ख्यौली घर जाँदा ति व्यक्तिहरुको काठमाडौं उपत्यकामा रहेको घरमा चोरी हुने घटना अत्यधिक हुने गरेको छ । तसर्थ यस्ता घटना हुन नदिन प्रहरीले घरधनीसँग नै समन्वय गर्ने योजना बनाएको महानगरीय प्रहरी परिसर काठमाडौंका प्रमुख एसएसपी उत्तम सुवेदीले बताउनुभयो ।
दशैं मनाउन आफ्नो पुर्ख्यौली घर जाने सबै घरधनीले नजिकको प्रहरी कार्यालयमा जानकारी गराएमा त्यहाँ विशेष निगरानी राखिने उहाँले बताउनुभयो । साथै कुनै घटना भई खबर पाएको १ मिनेटमै प्रहरी उपलब्ध गराउने पनि उहाँले बताउनुभएको छ ।
प्रहरीले लामो अध्ययन र अनुसन्धान गरेर सुरक्षाका दृष्टिकोणले संवेदनशील क्षेत्र पहिचान गरेको र सो क्षेत्रमा विशेष निगरानी राखिने बताइएको छ ।
काठमाडौं जिल्लाका १४ ठाउँहरुलाई सुरक्षा संवेदनशीलताका आधारमा ‘भिन्न भिन्न एरिया’का रुपमा विभाजन गरिएको छ । यस्ता एरियामा परिचालन हुने प्रहरी टोली पनि सुरक्षा संवेदनशीलताका आधारमा निर्धारण गरिएको सुवेदीको भनाइ छ ।
गस्ति टोलिलाइ तयारी अवस्थामा राखेको र कुकुर सहितको सर्च अपरेशन चलाइने योजनामा नेपाल प्रहरी रहेको बताइएको छ । यसका साथै दशैंका बेला हुनसक्ने संभावित घटनाका लागि सादा पोसाकमा पनि प्रहरी परिचालन हुने एसएसपी सुवेदीले बताउनुभएको छ ।
२०७६ भदौ ०६ गते प्रकाशित
वि.सं.२०७६ असोज ६ सोमवार १४:४६ मा प्रकाशित
