काठमाडौं । भारतबाट चोरी गरी महिन्द्राको गाडीमा फल्सबटम बनाई अवैध रुपमा राजधानी भित्र्याउन लागेको ५५ थान मोबाइल प्रहरीले बरामद गरेको छ ।
भारतीय डिएल १२ सिए १४५८ नम्बरको सेतो महिन्द्रा गाडीमा महानगरीय प्रहरी प्रभाग बलम्वुका प्रमुख प्रहरी निरीक्षक शंकर खड्काको टोलीले चेकजाँच गर्दा विभिन्न कम्पनी र ब्राण्डका ५५ थान चोरीका मोबाइलसहित दुई जनालाई पक्राउ गरिएको बताएका छन् ।
बरामद गरिएका मोबाइल आइफोन, स्यामसुङ, एमआइ,कुलप्याड लगायतका रहेका छन् । बरामद भएको चोरीका मोबाइल १० लाख बराबरको रहेको प्रहरी निरीक्षक खड्काले बताउनुभयो ।
मोबाइलसहित पक्राउ पर्नेमा भारत दिल्ली लक्ष्मीनगरका ३३ वर्षीय दीपक महाजन र दिल्ली शास्त्रीपार्कका ३६ वर्षीय मोहम्मद चाँद रहेको महानगरीय प्रहरी परिसर काठमाडौंका प्रमुख एसएसपी उत्तमराज सुवेदीले बताउनुभएको छ । पक्राउ परेका दुबै जनालाई गाडी र मोबाइलसहित कारबाहीको लागि राजश्व कार्यालय ललितपुर पठाएको बताइएको छ ।
दसैं, तिहार, छठ लगायतका चाडमा हुने चोरी पैठारी नियन्त्रण गर्न तथा पटका लगायत संवेदशील वस्तुहरू भित्रने हुँदा नागढुंगा लगायत मुख्य नाकामा कडाइ गरीएको प्रहरीले जनाएको छ ।
२०७६ भदौ ०६ गते प्रकाशित
वि.सं.२०७६ असोज ६ सोमवार १५:३१ मा प्रकाशित
