काठमाडौं। आर्थिक वर्ष २०७५/७६ को गत माघदेखि असारसम्मको ६ महिनाको अवधिमा ओभर द काउन्टर (ओटीसी) बजारमा १ अर्ब ६३ करोड ४९ लाख ३३ हजार ४१४ रुपैयाँको कारोबार भएको छ ।
ओटीसी बजारबाट कारोबार बढाउने भन्दै नेपाल धितोपत्र बोर्डले कमिसन घटाउन थालेपछि ओटीसी बजारमा कारोबार बढ्न थालेको छ ।
जुनसुकै कारोबारमा डेढ प्रतिशत शुल्क लिने व्यवस्थालाई परिवर्तन गरी बोर्डले कारोबार रकम अनुसार कमिसन शुल्क वर्गीकृत गरेको छ ।
पब्लिक कम्पनीमा रूपान्तरण भएका तर सार्वजनिक सेयर निष्कासन नगरेका एवं नेप्सेबाट सूचीकरण खारेज भएका कम्पनीको कारोबार गराउनका लागि ओटीसी बजार सञ्चालनमा ल्याइएको हो ।
ओटीसी कारोबार सञ्चालनका लागि धितोपत्र बजार सञ्चालन नियमावली,२०६४ लाई आधार मानेर नेप्सेले ओटीसी बजार सञ्चालन विनियमावली, २०६५ पनि बनाएको छ ।
सेयर बजार व्यापारमा ब्रोकरहरूजस्ता मूल्य प्रणालीको संलग्नताबिना सिधा एक्सचेञ्ज मार्फत व्यापार गर्न अपनाइएको प्रणाली ओटीसी बजार हो । यसमार्फत हुने व्यापारलाई छोटकरीमा ओटीसी अर्थात ओभर दि काउन्टर भनिन्छ ।
सामान्यतयाः नेप्सेमा सूचीकरण हुन नसकेका, सूचीकरणबाट हटाइएका तथा सूचीकरणका लागि आवश्यक सर्त पूरा गर्न नसकेको कम्पनीहरूको धितोपत्रहरूमा तरलता कायम गरी सर्वसाधारण लगानीकर्ताको हित संरक्षण गर्ने हेतुले ओटीसीमार्फत सेयर व्यापार गर्ने गरिन्छ ।
२०७६ असोज ०७ गते प्रकाशित
वि.सं.२०७६ असोज ७ मंगलवार १३:४७ मा प्रकाशित