काठमाडौं । बैंक अफ काठमाण्डूको ऋण दूरुपयोग मुद्दामा उच्च अदालत पाटनमा धुनछेक बहस सुरु भएको छ । बैंकका पूर्व सिइओ अजय श्रेष्ठसहित वहालवाला र पूर्व कर्मचारीसहित ऋणी तथा भ्यालुएटरको थुनछेक बहस सुरु भएको हो ।
प्रहरीले सरकारी वकिललाई विवरण वुझाएपछि बुधबार नै मुद्दा दर्ता गरिएको हो। सरकारी वकिल कार्यालयले ऋणी सुरेन्द्र श्रेष्ठ, योजनाकार भुपेन्द्र श्रेष्ठ तथा भ्यालुएटरलाई सरकारी कागज किर्तेमा जिल्ला अदालत काठमाडौमा पनि मुद्दा हालेको छ ।
जिल्ला अदालतमा जालसाझीको मुद्दा दर्ता भएको छ । अदालतले थुनछेक बहस सकेपछि तीन वटामध्ये एउटा निर्णय गर्ने छ । अदालतले साधारण तारेखमा पनि छाड्न सक्छ, वा धरौटीमा पनि रिहा गर्न सक्छ । नभए पूर्पक्षका लागि थुनामा पठाउन पनि सक्छ ।
अहिले धमाधम बहस चलिरहेको छ। दसैं बिदा आइतबारबाट सुरु हुन्छ । आइतबारबाटै अदालत बिदा हुन्छ । त्यसैले आज र भोलिमा थुनछेक बहस सकिने संभावना छ ।
२०७६ असोज ०९ गते प्रकाशित
वि.सं.२०७६ असोज ९ बिहीवार १५:५७ मा प्रकाशित