काठमाडौं । दशैं पर्वको मुखमै प्याजको मूल्य आकासिएको छ । अधिकांश खानाका परिकारमा अत्यावश्यक प्याजको मूल्य एकाएक बृद्धि भएपछि माग घटेको छ ।
मूल्यवृद्धि भएसँगै बजारमा प्याजको माग घटेको छ । दैनिक २० टन बिक्री हुने प्याज अहिले पाँच टनमा झरेको छ। भारतमा यस वर्ष प्याज उत्पादनमा आएको कमीले नेपालमा असर परेको हो ।
भारतमा ढिलो गरी सुरु भएको मनसुन र लगातारको वर्षाले खेती नष्ट भएपछि प्याजको मूल्यबृद्धि भएको बताइएको छ । ‘वर्षाले भारतमा ठूलो मात्रामा प्याज खेती नष्ट भएको छ,’ प्याज आयातकर्ता एवं अम्बे इन्टरनेशनलका सञ्चालक मोहन बानियाँले भन्नुभयो, ‘जसको असर मूल्यमा परेको हो । अहिले आयात भइरहेको प्याज पुरानो स्टक हो’ ।
भदौदेखि प्याजको मूल्यबृद्धि हुन सुरु भएको थियो । प्याज व्यापारीका अनुसार साउनमा प्याजको थोक मूल्य प्रतिकिलो २५ रुपैयाँ थियो ।भदौमा ४० रुपैयाँ पुग्यो।
असोज लगत्तै प्याजको मूल्य ह्वात्तै बढेर ९५ रुपैयाँ प्रतिकिलो पुगेको छ । तर, सर्वसाधारणको भान्सासम्म पुग्दा प्रतिकिलो एकसय २० देखि ३० सम्म पर्ने गरेको छ । -अन्नपूर्ण पोस्टमा खबर प्रकाशित छ ।
२०७६ असोज १२ गते प्रकाशित
वि.सं.२०७६ असोज १२ आइतवार ०७:३४ मा प्रकाशित
