काठमाडौं । नेपाल इन्भेष्टमेन्ट बैंकले आफ्नै पेमेन्ट गेटवे सुरु गरेको छ । घटस्थापनाको अवसर पारेर बैंकले आफ्ना डेबिड–क्रेडिट भिसा कार्ड बाहक ग्राहकहरूका लागि गेटवे सुरु गरेको जनाएको छ ।
यो प्रणाली सुरक्षित भएको बैंकले दाबी गरेको छ । व्यापारिक भुक्तानी पोर्टल (वेबसाइट आदि), प्राप्तिकर्ता बैंक, भिसाजस्ता कार्ड विनियम प्रणाली र जारीकर्ता बैंकबीच कारोबार भएकै समयमै (रियल टाइम) यसबाट भुक्तानी हुने छ ।
उच्च सुरक्षित इन्क्रिप्सन र अन्य बहुआयामिक सुरक्षा विधिहरूबाट कारोबारका डाटाहरू सुरक्षित बनाइएको बैंकले जानकारी दिएको छ । यो प्रणालीबाट व्यापारीहरूले विश्वभरि नै आफ्ना वस्तु तथा सेवा बिक्री गर्न सक्ने बैंकको भनाई छ ।
साथै, कार्ड बाहकहरूले इ–कर्मस साइटबाट सातै दिन चौबीसै घण्टा सुरक्षित रुपमा अनलाइनबाट वस्तु तथा सेवा किनमेल गर्न सक्ने बैंकले जानकारी गराएको छ ।
यो प्रणाली सुरु गरेको अवसरमा छानिएका बिक्रेताहरूमा लागू हुने गरी अनलाइन कारोबारमा २५५ सम्म नगद फिर्ता (क्यास ब्याक) अफर बैंकले घोषणा गरेको छ ।
हाल इन्भेष्टमेन्ट बैंकले ८२ शाखा, १२२ एटिएम, १५ एक्सटेन्सन काउन्टरहरू, १० राजस्व संकलन काउन्टरहरू र ५५ शाखारहीत बैंकिङ काउन्टरमार्फत आफ्ना ग्राहकहरूलाई सेवा दिंदै आएको छ ।
२०७६ असोज १४ गते प्रकाशित
वि.सं.२०७६ असोज १४ मंगलवार ११:०६ मा प्रकाशित